ՀՀ փոխվարչապետ, տարածքային կառավարման նախարար Արմեն Գևորգյանն այսօր Շիրակի մարզի Ամասիա համայնքում ներկա է գտնվել արվեստի դպրոցի հիմնանորոգված շենքի բացման արարողությանը, որին մասնակցում էին նաև Պետեկամուտների կոմիտեի նախագահ Գագիկ Խաչատրյանը, մարզպետ Ֆելիքս Ցոլակյանը, այլ հյուրեր:
Համայնքում գտնվող նախկին կիսակառույց շենքը հիմնանորոգվել է «Յուքոմ» ընկերության միջոցներով և Ամասիայի վերականգնման հիմնադրամի աջակցությամբ, ծրագրի ընդհանուր արժեքը կազմել է 130 մլն դրամ: Շենքում կգործի ինչպես երաժշտական դպրոցը, այնպես էլ արվեստի տարբեր խմբակներ: Կրթօջախն ապահովվել է նաև անհրաժեշտ գույքով:
ՏԿՆ հասարակայնության հետ կապերի բաժնից «Առաջին լրատվական»-ին հայտնում են, որ փոխվարչապետը շնորհավորեց բնակիչներին, ուսուցիչներին և սաներին` հարմարավետ ու բարեկարգ դպրոցի բացման կապակցությամբ, որտեղ արդեն ստեղծված են անհրաժեշտ բոլոր պայմանները ուսումնական գործընթացը կազմակերպելու համար: Նա գոհունակություն է հայտնել, որ պետական-մասնավոր համագործակցությամբ համայնքային նշանակության կարևոր ծրագրեր են իրականացվում և հույս է հայտնել, որ այդ միտումները կպահպանվեն:
Փոխվարչապետը մարզպետի և համայնքապետի ուղեկցությամբ շրջայց է կատարել է նորոգված շենքում, ծանոթացավ ստեղծված պայմաններին, ինչպես նաև այցելեց համայնքի մանկապարտեզի շենք, որը հիմնանորոգվել է Հայաստանի սոցներդրումների հիմնադրամի ծրագրով և արդեն մեկ տարուց ավելի գործում է:
Համայնքապետը փոխվարչապետին տեղեկություններ ներկայացրեց նախատեսվող ծրագրերի մասին: Հայաստանի սոցներդրումների հիմնադրամի միջոցներով և համայնքի համաֆինանսավորմամբ համայնքի կինոթատրոնի շենքը կվերակառուցվի որպես մարզամշակութային կենտրոն, իսկ «Յուքոմ» ընկերության և Հայաստանի ֆուտբոլի ֆեդերացիայի համատեղ ջանքերով կվերականգնվի մարզադաշտը:
Փոխվարչապետը խորհրդակցություն է անցկացրել նաև Ամասիայի վերականգնման հիմնադրամում: Քննարկվել են իրականացվող ծրագրերի, ինչպես նաև գյուղացիական կոոպերատիվների ստեղծման և անհրաժեշտ աջակցության ցուցաբերման հետ կապված հարցեր:
