Ռուսաստանը, Բելառուսն ու Ղազախստանը մրցունակության առումով էականորեն զիջում են ԵՄ երկրներին: Այս մասին այսօր հայտարարեց Գործատուների հանրապետական միության նախագահ Գագիկ Մակարյանը: Նրա խոսքով՝ Հայաստանը տնտեսության մրցունակության բարձրացման քայլեր արդեն իսկ արել էր՝ Արևելյան գործընկերության շրջանակներում:
Նրա խոսքով՝ այժմ մենք պետք է փորձենք համագործակցության ձևեր գտնել ԵՄ-ի հետ աշխատանքները շարունակելու համար, քանի որ Մաքսային միությանը միանալը չի կարող բարձրացնել մեր տնտեսության մրցունակությունը: Ավելին՝ երկարաժամկետ հեռանկարում մենք կարող ենք կորցնել այն:
Գ. Մակարյանը համոզված է, որ Մաքսային միությանն անդամակցելու վերջնական որոշումը կայացվել է շատ կարճ ժամանակում և անվտանգության նկատառումներից ելնելով: Մաքսային միությունը ինչ-որ օգուտներ կարող է տալ տնտեսությանը, եթե պետությունը փորձի, օրինակ, Ռուսաստանի ապրանքային շուկաներում հայկական ապրանքներ արտահանելու քվոտաներ ստանալ մեր արտադրողների համար:
Ամեն դեպքում Մաքսային միության շրջանակում մեր աշխատանքը, ըստ Գ. Մակարյանի, հեշտ չի լինի: «Երեկ Մաքսային միության ներկայացուցիչներ էին ժամանել Ռուսաստանից, և էկոնոմիկայի նախարարությունում երկար քննարկում տեղի ունեցավ: Մաքսային միության շրջանակում մեր աշխատելը հեշտ չի լինելու, որովհետև ես այնտեղ զգացի այն խորհրդային շունչն ու հին բյուրոկրատական մեխանիզմները, իներցիան, որոնք կային նախկինում: Համակարգը էականորեն չի փոխվել: Մարդիկ, որոնք ընդգրկված են այդ գործընթացները կազմակերպելու մեջ, հին են և առաջնորդվում են հին մեթոդներով»,- ասաց Գ. Մակարյանը:
