Դրամը ընթացիկ շաբաթվա ընթացքում ևս շարունակեց արժեզրկվել, ինչպես այս տարվա գրեթե բոլոր շաբաթներին։ Շաբաթվա սկզբի 374.7 դրամ/դոլար դիմաց փոխարժեքը շաբաթվա վերջին (երեկ) դարձավ 377.6 դրամ/դոլար։ Տնտեսագետ Վահագն Խաչատրյանը կարծում է, որ դրամի արժեզրկման ուղղությամբ աշխատող գործոնները բավականին ուժեղ են։
«Նախ՝ ներմուծման և արտահանման տարբերությունը բավականին մեծ է, շատ ավելի մեծ, քան նախաճգնաժամային տարիներին, թեև վերջին 1-1.5 տարում արտահանումն ավելի արագ է աճել, քան ներմուծումը։ Իսկ այդ մեծ տարբերությունը դոլարի նկատմամբ լուրջ պահանջարկ է առաջացնում։ Երկրորդ՝ արտաքին պետական պարտքի սպասարկման համար նախատեսված ծախսերը կտրուկ աճել են այս տարի և էլ ավելի կտրուկ աճելու են առաջիկա երկու-երեք տարիներին՝ հասնելով տարեկան 300-400 մլն դոլարի։
Բայց, որ ամենակարևորն է՝ ինչպես Ռուսաստանից է սկսվել կապիտալի հսկայական արտահոսք՝ կապված քաղաքական սպասվող զարգացումների հետ (մոտենում է նախընտրկան շրջանը), այնպես էլ Հայաստանից կապիտալի արտահոսքը լուրջ չափերի է հասել։ Այսինքն` քաղաքական անկայունությունը սկսել է լուրջ գործոն հանդիսանալ փոխարժեքի ձևավորման գործում»,- ասաց Վ. Խաչատրյանը՝ հավելելով, որ դրամի արժևորման ուղղությամբ աշխատող գործոնները, օրինակ՝ տրանսֆերտների աճը, այս ամենի ֆոնին բավականին թույլ են։ Ընդ որում, ըստ Վ. Խաչատրյանի, առաջիկայում ևս պետք է սպասել դրամի արժեզրկում։