ՀՀ տրանսպորտի, կապի և տեղեկատվական տեխնոլոգիաների նախարարի տեղակալ Բորիս Դեմիրխանյանն ապրիլի 5-ին ընդունել է հայկական տեխնոլոգիական ընկերությունների ներկայացուցիչներին, ովքեր վերադարձել են ICANN58 և CEBIT 2017 միջոցառումներից: Այս մասին տեղեկացրին ՀՀ տրանսպորտի, կապի և տեղեկատվական տեխնոլոգիաների նախարարության լրատվական ծառայությունից` հավելելով.«Կոպենհագենում մարտի 11-16-ը կ այացած ICANN58 և Հանովերում մարտի 20-24 տեղի ունեցած CEBIT 2017 միջոցառումներին մասնակցած հայկական տեխնոլոգիական ընկերությունների պատվիրակներն իրենց տպավորություններով և ձեռք բերված հաջողություններով կիսվեցին նախարարի տեղակալի հետ:
Բորիս Դեմիրխանյանն ընդգծեց, որ ընկերությունների` մասշտաբային միջոցառումներին մասնակցության փորձը շատ օգտակար է հետագայում նաև մեր երկրի անունից այդ ցուցահանդեսներում տաղավար ունենալու համատեքստում:
CEBIT-ը աշխարհի խոշորագույն տեխնոլոգիական միջոցառումներից է, որին մասնակցում է ավելի քան 3000 ցուցադրող ընկերություն: Այս տարի Հայաստանից ցուցահանդես է մեկնել 19 ընկերությունների 24 ներկայացուցիչների պատվիրակություն` «ԱՐՄԻՔՍ» հիմնադրամի ղեկավարությամբ:
Միջոցառման այս տարվա հիմնական ուղղություններն են եղել վիրտուալ իրականությունը (VR), արհեստական ինտելեկտը (AI), ամպային տեխնոլոգիաներն ու կիբեռանվտագությունը: Հայ մասնակիցների խոսքով` հայկական ընկերություններն այս ոլորտներից մի քանիսում եվրոպական շուկայում ներկայացնելու համար մրցունակ պրոդուկտներ ունեն: «ԱՐՄԻՔՍ» հիմնադրամի տնօրեն Վահան Հովսեփյանը կարևորեց նմանատիպ միջոցառումներին երկրի անունից միասնական տաղավարով հանդես գալը, ինչը կնպաստի միջազգային ասպարեզում Հայաստանի ՏՏ վարկանիշի բարձրացմանը»։
