ՀՀԿ խոսնակ Էդուարդ Շարմազանովի գնահատմամբ՝ Ընտրական նոր օրենսգիրքը թույլ տվեց Հայաստանում անցկացնել ավելի լավ ընտրություններ: Ընդունելով, որ եղել են նաև թերություններ, այնուամենայնիվ նա գտնում է, որ տեխնիկական վերազինման առումով ընտրողի ձայնը չկորավ, բացառվեց կրկնաքվեարկությունը:
Գնահատելով քվեարկության արդյունքները՝ նա նշեց, որ հանրությունը Հանրապետական կուսակցությանը տվեց իր վստահության քվեն, ինչը պարտավորեցնող է եւ հնարավորություն է տալիս շարունակելու սկսած բարեփոխումները: «Ես սա հաղթանակ չեմ համարում, որովհետեւ հաղթանակները լինում են մարտի դաշտում: Սա շատ պարտավորեցնող է»,- «Արմենպրեսի» հետ զրույցում ասել է Շարմազանովը:
Շնորհավորելով հաջորդ գումարման խորհրդարան անցած մյուս երեք ուժերին, նա հույս հայտնեց, որ բոլոր պատգամավորներն, անկախ կուսակցական պատկանելիությունից, կանեն հնարավորը, որպեսզի Հայաստանում պետական ու ազգային շահերն ավելի ճիշտ սպասարկվեն:
Անդրադառնալով հարցին, թե քանի մանդատ կունենա ՀՀԿ-ն խորհրդարանում, Շարմազանովն ասաց, որ դա կհաշվի Կենտրոնական ընտրական հանձնաժողովը: «Այն, որ Հանրապետական կուսակցությունը հաջողության է հասել եւ ամբողջությամբ իրավունք ունի կառավարություն ձեւավորելու, դա փաստ է»:
Լուսանկարը՝ Photolure-ի
