Интерфакс լրատվական գործակալության փոխանցմամբ, ուրբաթ օրը Թբիլիսիում՝ խորհրդարանից ոչ հեռու գտնվող մետրոպոլիտենի «Ազատության հրապարակ» կայարանի մոտ հայտնաբերվել է երկու դիակ։
Այս կապակցությամբ Վրաստանի ՆԳՆ-ն հայտարարել է, որ այդ դիակները հայտնաբերվել են մետրոպոլիտենի «Ազատության հրապարակ» կայարանի մոտ գտնվող խանութներից մեկի տանիքին։ Նախնական տեղեկություններով, նրանց մահվան պատճառը հոսանքահարումն է։
ՆԳՆ-ն հայտարարել է, որ հետաքննությունը կհաստատի, թե արդյո՞ք նրանք կապ են ունեցել Ռուսթավելի պողոտայում տեղի ունեցած ընդդիմության ակցիայի հետ։
Վրացական լրատվամիջոցները ենթադրում են, որ հոսանքահարվածներից մեկը կարող է լինել Նիկա Կվինտրաձեն, որին իր ընտանիքը շարունակում էր փնտրել ընդդիմության ցույցի ցրումից հետո։
Հիշեցնենք, որ վրացական լրատվամիջոցների համաձայն՝ բողոքի ակցիայի մասնակիցներից 46-ի ճակատագիրը դեռևս անհայտ է։