«Պարզվում է, որ համանախագահող երկրների նախագահները հստակեցրել են վերջնական փաստաթուղթը, սակայն այդ մասին անգամ կողմերը որևէ հայտարարություն չեն արել, չեն հստակեցրել, թե արդյոք իրենք համաձայն են այդ փաստաթղթին, և հետևաբար այս մշուշոտ իրավիճակում որևէ կերպ հնարավոր չէ պատկերացնել, թե ինչ համաձայնության կարող են գալ կողմերը»,- «Առաջին լրատվականի» հետ զրույցում խոսելով Դովիլում ԵԱՀԿ ՄԽ համանախագահող երկրների նախագահների հայտարարության մասին` կարծիք հայտնեց Ռազմավարական և ազգային հետազոտությունների հայկական կենտրոնի ղեկավար Մանվել Սարգսյանը:
Նա նկատեց, որ փաստացի այս հայտարարության մեջ նախագահները խոսում են Հայաստան-Ադրբեջան-Ռուսաստան վերջին`Սոչիի հանդիպման ժամանակ ձեռք բերված ինչ-որ համաձայնության մասին. «Սա նշանակում է, որ Սոչիում ինչ-որ փաստաթուղթ առաջարկվել է, որի մասին շատ քիչ է խոսվել, և կողմերն էլ Սոչիի հանդիպումից հետո որևէ հստակ հայտարարություն չեն արել: Իսկ մինչ այս Հայաստանը խոսում էր 2007թ. առաջարկված Մադրիդյան սկզբունքների, Ադրբեջանը` 2009-ի նորացված կոչվող Մադրիդյան սկզբունքների մասին»:
ՌԱՀՀԿ ղեկավարը նաև ընդգծեց, որ Դովիլի հայտարարության մեջ շատ կարևոր մի գնահատական կար, համաձայն որի այսօրվա իրավիճակը ժամանակին ուժի կիրառման արդյունք է, և նոր պատերազմը կարող է ավելի սաստկացնել այս իրավիճակը. «Սա միանշանակ ուղղված էր Ադրբեջանին, որ կդատապարտվի ուժի կիրառումը: Այս ընդգծումը կարելի է գնահատել որպես էական քայլ այս բարդ իրավիճակում»:
Մանվել Սարգսյանը նաև առանձնացրեց Օբամայի, Սարկոզիի և Մեդվեդևի համատեղ հայտարարության այն մասը, որտեղ վերջիններս բոլոր կողմերին են հրավիրում պատրաստել ժողովրդին խաղաղության. «Փաստորեն, նրանք չեն նշել երկու կողմերին, այլ ասել են կողմեր, ինչն էլ նշանակում է, որ Ղարաբաղին ևս նկատի ունեն: Սա նորություն էր»:
