Մինչ պատմամշակութային հուշարձան «Փակ շուկայի» վերակառուցման և ներկայիս տեսքով շահագործման համար պայքարող շուրջ 2 հազար քաղաքացիներ իրենց բողոքն են բարձրացնում «Ազատագրենք հուշարձանն օլիգարխից» նախաձեռնության դեմ, նախաձեռնության շուրջ 30 ակտիվիստներ Մաշտոցի պուրակում խորհրդակցում են և ռազմավարություն մշակում:
«Առաջին լրատվական»-ի հետ զրույցում նախաձեռնության անդամ, համակարգային վերլուծաբան Գարեգին Չուգասզյանն ասաց, որ իրենք շարունակում են հուշարձանի ազատագրման համար մղվող պայքարը, սակայն շատ լավ հասկանում են, թե ինչ է կատարվում. նրանք ցանկանում են հասարակության միջև սեպ խրել՝ հրահրելով սադրանքներ:
«Մենք մեր ժողովրդի դեմ դուրս չենք գա: «Փակ շուկայի» մոտ կանգնածները մեր քույրերն ու եղբայրներն են: Ի դեպ, մենք ակցիաներ ենք իրականացնելու ոչ միայն «Փակ շուկայի» մոտ, այսօր էլ մոտենալու ենք «Փակ շուկային»,- նշեց Գարեգին Չուգասզյանը:
Վերջինս նաև ասաց՝ այն, ինչ տեղի է ունենում «Փակ շուկայի» մոտ, իրենց համար անսպասելի չէ, ավելին՝ դրական է, դրա վրա ուշադրություն կդարձնեն ոչ միայն պատկան մարմինները, այլև մեր մյուս համաքաղաքացիները:
Նա ակնարկեց, որ նախաձեռնությունը կփորձի դարձի բերել ճիշտ ուղուց շեղված հայրենակիցներին, որոնք այս պահին Սամվել Ալեքսանյանին բարերար են անվանում:
Լուսանկարը՝ PanARMENIAN Photo-ի