Նախախորհրդարանի անդամ, կինոռեժիսոր Տիգրան Խզմալյանն իր և քաղաքացիական ակտիվիստների՝ այս պահին Փակ շուկայի մոտ չգտնվելու և ԱԺ պատգամավոր Սամվել Ալեքսանյանի համախոհների դեմ պատասխան բողոքի ակցիա չիրականացնելու փաստը բացատրում է նոր բախումներ չհրարհրելու հանգամանքով: Այս մասին նա ասաց «Առաջին լրատվական»-ի հետ զրույցում:
«Տեղեկացանք, որ ի դեմս Սամվել Ալեքսանյանի աշխատակիցների, Փակ շուկայի մոտ կազմակերպված խաժամուժ է բերվել: Ալեքսանյանը նպատակ ունի մի վտանգավոր իրավիճակ ստեղծել, այն է՝ քաղաքացիների միջև սադրանք հրահրելու փորձ կատարել: Մենք որոշեցինք նման սադրանք թույլ չտալ: Մեր պայքարը ժամերով չէ, այլ մշտական բնույթ է կրում, մանավանդ, որ «Փակ շուկայի» վերաբերյալ հասարակության պահանջը համընկնում է պետական ատյանների պահանջի հետ»,- ասաց Տիգրան Խզմալյանը:
Հարցին՝ պատրաստվո՞ւմ են արդյոք Փակ շուկա այսօր չներկայանալու փոխարեն մեկ ուրիշ օր պատասխան ակցիա կազմակերպել, կինոռեժիսորը նշեց. «Խաժամուժին չենք պատրաստվում պատասխանել: Մենք իրենց հետ գործ չունենք: Իրենք քաղաքական շահագործման զոհեր են, մոլորված մարդիկ: Իսկ մենք պայքարում ենք օրինականությունը վերականգնելու համար, և մեր պայքարն ավարտ չունի»:
Հիշեցնենք, որ քաղաքացիական ակտիվիստներն այսօր պետք է Փակ շուկայի մոտ ակցիա անցկացնեին՝ բողոքելով պատմամշակութային հուշարձանի քանդման դեմ: Հատկանշական է, սակայն, որ նրանք այս պահին այնտեղ չեն:
