Մայիսի 6-ին վեց տարի լրացավ այն օրվանից, երբ Youtube-ում սկսվեցին փորձարկումները և տեսանյութերի տեղադրումը: Այդ կապակցությամբ Google ընկերությունը, որին է պատկանում այդ կայքը, հրապարակել է հետաքրքիր վիճակագրություն:
Ըստ այդմ պարզվել է, որ ամեն րոպե այս կայքում վերբեռնվում է 48 ժամ տեսանյութ՝ նախորդ տարվա վերջի 35 ժամի փոխարեն: Օրական օգտատերերը նայում են 3 միլիարդ տեսանյութ, նախորդ տարվա նույն ժամանակահատվածի համեմատ այս թիվն աճել է 50%-ով:
Google-ի զեկույցում ասվում է, որ այսքան դիտումները հավասար են նրան, որ երկրագնդի բնակչության կեսը օրվա մեջ մեկ անգամ մտնում է Youtube, կամ ԱՄՆ բնակչությունը պարտադիր օրը 9 տեսանյութ է նայում այդ կայքում:
Նախատեսվում է, որ այս տարի Youtube-ի աշխատակիցների թիվը կավելանա մոտ մեկ երրորդով կամ 200 աշխատակցով։