Օգոստոսին հավկիթը թանկացել է 4-5 դրամով: Ինչո՞վ է սա պայմանավորված: Եթե աշխատեր սեզոնայնության գործոնը, ապա հավկիթը ոչ թե պետք է թանկանար, այլ էժանանար:
Ըստ տնտեսվարողների՝ հավկիթի գնի բարձրացումը պայմանավորված է ոչ միայն էներգակիրների, այլ նաև հավի կերի թանկացմամբ: Սակայն դեռ հստակ չէ, թե այս պատճառաբանությունները որքանով են հիմնավոր, և այս գործոնները ինչ չափով կարող էին ազդել գնաճի վրա:
ՏՄՊՊՀ-ն վերահսկողություն է իրականացնում հավի ձվի շուկայում գերիշխող դիրք ունեցող 4 տնտեսվարող սուբյեկտների գործունեության նկատմամբ՝ Լուսակերտի տոհմային թռչնաբուծական ֆաբրիկա, Երևանի թռչնաբուծական ֆաբրիկա, «Արաքս» թռչնաֆաբրիկա, Արզնու տոհմային թռչնաբուծական ֆաբրիկա: Այս արտադրողների հավկիթի գինը, կախված տեսակներից և ներկայացման ձևից (տուփով կամ առանց տուփի), տատանվում է 1 հատը 65-70 դրամի սահմանում: Գնաճը նկատվել է օրենքով գերիշխող ճանաչված 5 խոշոր սուպերմարկետներում՝ «ՍԱՍ», «Երևան city», «Մոսկվիչկա», «Նոր Զովք» և «Սթար»:
Ի դեպ, հանձնաժողովը նույն սուպերմարկետներում նկատել է նաև գնային նվազում՝ շաքարավազի, ալյուրի, բուսական յուղի և մակարոնեղենի ապրանքային շուկաներում:
Այժմ հանձնաժողովը գրությամբ դիմել է գերիշխող տնտեսվարողներին, որպեսզի վերջինները 5-օրյա ժամկետում ներկայացնեն իրենց հիմնավորումները, ինչպես նաև համապատասխան փաստաթղթերը՝ հավկիթի գնային փոփոխության վերաբերյալ:
ՏՄՊՊՀ մամուլի քարտուղար Գայանե Սահակյանը «Առաջին լրատվական»-ի հետ զրույցում նշել է, որ հանձնաժողովի կողմից սահմանված հնգօրյա ժամկետի ավարտից հետո, այսինքն՝ հաջորդ շաբաթ, կստացվի պահանջված տեղեկատվությունը, որը կուսումնասիրվի ՏՄՊՊՀ մասնագետների կողմից: Կուսումնասիրվի նաև ապրանքի գնագոյացման վրա ազդող բոլոր բաղադրիչների հնարավոր ազդեցությունը ձվի գնի բարձրացման վրա: Եթե պարզվի, որ պատճառաբանությունները հիմնավոր չեն, և տնտեսվարողները չարաշահել են իրենց գերիշխող դիրքը, ապա նրանցից յուրաքանչյուրը կտուգանվի մինչև 200 մլն դրամով:
Հիշենցնենք, որ մոտ մեկ ամիս առաջ հանձնաժողովը նկատել էր նաև գնի մինչև 20 դրամով բարձրացում գարեջրի, հանքային ջրի և զովացուցիչ ըմպելիքների շուկայում և սկսել էր վերոնշյալ շուկաներում ուսումնասիրություն իրականացնել: Տնտեսվարողներն արդեն ներկայացրել են պահանջվող փաստաթղթերը և տեղեկատվությունը, սակայն ուսումնասիրությունը, ըստ Գայանե Սահակյանի, դեռ ընթացքի մեջ է: Այստեղ նույնպես տնտեսվարողները գնային փոփոխությունը պատճառաբանել էին գազի և, էլեկտրաէներգիայի թանկացմամբ, բայց նշված պատճառներից էր նաև հումքի գնի բարձրացումը:
Ըստ ոչ պաշտոնական վարկածի՝ գարեջրի, հանքային ջրի և զովացուցիչ ըմպելիքների թանկացման պատճառը պարտադիր ակցիզավորման պահանջն է: Չնայած նրան, որ դրոշմապիտակի գինը հանվում է տնտեսվարողի ապագա վճարվելիք հարկերի գումարից, այն հանգեցնում է ստվերային շրջանառության կրճատման, ինչն էլ տնտեսվարողներին ստիպել է բարձրացնել գները:
Այսպիսով, գազի և էլեկտրաէներգիայի թանկացման հետևանքով սպառողական ապրանքների թանկացման շղթան արդեն բացված է: Որքանով է այս թանկացումը հիմնավոր՝ կպարզի ՏՄՊՊՀ-ն, իսկ որ ապրանքները հաջորդիվ կթանկանան՝ ցույց կտա միայն ժամանակը: