Վրացական GHN լրատվական գործակալության փոխանցմամբ, Վրաստանում ԱՄՆ դեսպան Ջոն Բասը մեկնաբանել է ուժային մեթոդով վրացական ընդդիմության ցույցի ցրումը.
«Պետք է հաշվի առնել այն հանգամանքը, որ մարդկանց մի մասն ընդդիմության ցույցերին ներգրավվել էր ոչ խաղաղ նպատակներով: Նրանք ձգտում էին ուժային հակամարտության:
Իշխանությունները կարևոր քայլ կատարեցին, երբ ցուցարարներին իրենց ակցիան շարունակելու համար առաջարկեցին այլընտրանքային վայր, որպեսզի հնարավոր լինի ռազմական շքերթի անցկացումը: Ես զարմացած եմ նրանից, որ ցույցի ցրման ժամանակ մի շարք դեպքերում չափից ավելի ուժ է կիրառվել: Կառավարությունը պետք է լրջորեն հետաքննի այդ դեպքերը»:
Բասը նաև ցավակցություն է հայտնել ցույցի ցրման ժամանակ զոհվածների ընտանիքներին:
Հիշեցնենք, որ մայիսի 23-ին վրացական լրատվամիջոցները նշում էին, թե Բասը կոշտ խոսակցություն է ունեցել նախագահ Միխեիլ Սաակաշվիլիի հետ՝ պահանջելով ուժ չկիրառել ընդդիմադիրների նկատմամբ, որից հետո ունեցած առողջական խնդիրների պատճառով հայտնվել էր Թբիլիսիի կլինիկաներից մեկում: Սակայն հետագայում դա հերքվեց:
Ի դեպ, դրանից մեկ օր առաջ Թբիլիսիում հատուկջոկատայինները ռետինե փամփուշտների ու արցունքաբեր գազի միջոցով ցրել էին Հանրային հեռուստատեսության մոտ հավաքված ցուցարարներին:
