Ադրբեջանական APA լրատվական գործակալության փոխանցմամբ, ԵԽԽՎ նախագահ Մեվլյութ Չավուշօղլուն ողջունել է Իլհամ Ալիևի համաներման հրամանը, որի շնորհիվ ազատ է արձակվել ադրբեջանցի լրագրող էյնուլա Ֆաթուլաևը: Այս մասին նշված է ԵԽԽՎ մամլո ծառայության տարածած հաղորդագրության մեջ: ԵԽԽՎ նախագահն ընդգծել է, որ ԵԽԽՎ-ն և անձամբ ինքը բազմիցս կոչ են արել ազատ արձակել Ֆաթուլաևին:
Մեկնաբանելով Ֆաթուլաևի ազատ արձակումը` Ադրբեջանում ԱՄՆ դեսպան Մեթյու Բրայզան այդ լուրը որակել է որպես հիանալի և շատ դրական: Բրայզան ընդգծել է, որ դրան հասնելու համար բազմաթիվ մարդիկ են ջանքեր գործադրել:
Ըստ Բրայզայի` համաներման մասին որոշումը վկայում է Ադրբեջանում իրականացվող խոր բարեփոխումների մասին, բացի այդ, Ֆաթուլաևի ազատ արձակումը խոսում է Ադրբեջանում բարեփոխումների նոր դարաշրջանի սկզբի մասին:
Հիշեցնենք, որ համաներման արդյունքում ազատ է արձակվել բանտում գտնվող 70 մարդ, կիսով չափ կրճատվել է երկու բանտարկյալի պատժաժամկետը:
Ինչ վերաբերում է «Ռեալ Ադրբեջան» և «Ամենօրյա Ադրբեջան» անկախ թերթերի հիմնադիր Ֆաթուլաևին, ապա 2007 թվականի հոկտեմբերի 30-ին Բաքվի դատարանը քրեական օրենսգրքի 214-րդ հոդվածի 1-ին կետով (ահաբեկչական սպառնալիք), 213-րդ հոդվածի 2-րդ կետով (հարկերից խուսափում) և 283-րդ հոդվածի 2-րդ կետով (ազգամիջյան թշնամանքի հարուցում) նրան դատապարտեց 8.5 տարվա ազատազրկման:
Ի դեպ, Ֆաթուլաևի գործը բաղկացած էր 19 հատորից, որից 17-ը վերաբերում էր հարկերից խուսափելուն: Միջազգային հանրությունն անհեթեթություն է անվանել Ֆաթուլաևին ներկայացված այդ մեղադրանքները:
Ի դեպ, Ֆաթուլաևը «Ռեալ Ադրբեջանի» համարներից մեկում նշել էր, որ Իրանին հարված հասցնելու հարցում Բաքվի կողմից ԱՄՆ-ին աջակցելը խոցելի է դարձնում Ադրբեջանը և կարող է հանգեցնել Իրանի կողմից Ադրբեջանին ռազմական հարված հասցնելուն: Ֆաթուլաևը նշել էր նաև իրանական հավանական հարվածների ադրբեջանական թիրախները:
