Ապրիլի 2-ին կայանալիք խորհրդարանական ընտրություններին ընդառաջ՝ Gallup International associatiaton-ի հայաստանյան ներկայացուցչության տնօրեն Արամ Նավասարդյանը «Առաջին լրատվական»-ի հետ զրույցում կարծիք հայտնեց, որ ընտրություններին մասնակցող 5 կուսակցությունների և 4 դաշինքների դիրքերի առումով հասարակության, ընտրողի համար մասնատված է դաշտը:
Նրա խոսքով՝ մինչև հաջորդ շաբաթվա վերջը իրենք կկարողանան ամփոփել հետազոտության տվյալները և ներկայացնել հանրությանը մինչև քարոզարշավը ձևավորված պատկերը, իսկ ամսի 10-12-ից կնախաձեռնեն նոր հետազոտություն՝ ունենալու համար քարոզարշավից հետո ձևավորված պատկերը, և ըստ այդմ՝ կանցկացվեն զուգահեռներ:
Ինչպես նկատեց մեր զրուցակիցը՝ մոտավոր կարելի է ասել, որ առկա դոմինանտ երկու ուժերը իրենց դիրքերը պահպանել են:
Մասնավորապես, Արամ Նավասարդյանի կարծիքով՝ ՕՐՕ դաշինքի ցուցակը գլխավորող պաշտպանության նախկին նախարար Սեյրան Օհանյանի իմիջը բավականին դրական է, ինչը, սակայն, պայմանավորված է նրանով, որ մեր բանակը կայացած կառույց է. «Սակայն երբ Սեյրան Օհանյանին դիտարկում ենք որպես ընդդիմադիր գործիչ, այստեղ որոշակի խզում է տեղի ունենում, որովհետև ամեն դեպքում նա դիտարկվել է որպես իշխանական լծակներ ունեցող անձնավորություն, ուստի եղած խնդիրների մասին նա չէր կարող չիմանալ, և նրա «այլևս»-ը կարող էր գալ մեկ, երկու, երեք տարի առաջ, ոչ թե պաշտոնանկությունից հետո… Մենք չենք կարող հասկանալ՝ ինչ համ և բույր կա այդ ՕՐՕ դաշինքում. այնտեղ կան և՛ քաղցրավենիք, և՛ տուշոնկա, և՛ տարբեր մրգեր: Իսկ դրանից ճաշատեսակ չի ստացվում»:
Ինչ վերաբերում է «Ելք» դաշինքին, մեր զրուցակիցը նկատեց, որ Էդմոն Մարուքյանի և Նիկոլ Փաշինյանի նկատմամբ կա դրական վերաբերմունք, իսկ Արամ Սարգսյանի նկատմամբ գոնե չկա բացասական վերաբերմունք. ««Ելք» դաշինքը այն եզակի քաղաքական միավորումներից է, որը նոր և տարբեր հարցերի շուրջ հստակ մոտեցումներ է ցուցաբերում»: Արամ Նավասարդյանի կարծիքով՝ «Ելք»-ը կանցնի Ազգային ժողով:
«Ծառուկյան» դաշինքի առումով մեր զրուցակիցը նկատեց, որ փետրվարյան հայտնի դեպքերից հետո, ի հակառակ հետազոտողների սպասումների, «Ծառուկյանի ռեյտինգը նույնիսկ փոքր-ինչ աճել էր, բայց հետո նվազեց: Սակայն ամեն դեպքում պետք է արձանագրել, որ Գագիկ Ծառուկյանն ունի անձնական բարձր ռեյտինգ, սակայն դա չի նշանակում, որ այդ ռեյտինգը պետք է տարածվի «Բարգավաճ Հայաստան» կուսակցության վրա»:
Արամ Նավասարդյանի համար շատ տարօրինակ էր ՀԱԿ-ՀԺԿ դաշինքի ստեղծումը. «ՀԱԿ-ի ռեյտինգը բավականին ցածր էր… միգուցե նրանք տրվեցին մոդային և փորձեցին դաշինք կազմել: Լևոն Տեր-Պետրոսյանը հանդես բերեց մի գաղափար, որի մասին չեմ ուզում խոսել, որը ենթադրում է ընտրողների որոշակի զանգվածի համախմբում էդ մոտեցման շուրջը՝ ինչ-ինչ պատճառներով»:
Մեր զրուցակցի խոսքով՝ միակ կուսակցությունը, որն ունի ընդդիմադիրների կուռ զանգված, ՀՅԴ-ն է:
ՀՀԿ-ի քարոզարշավի ժամանակ շեշտադրումն արվելու է Կարեն Կարապետյան անձի հետ կապված. «Կարեն Կարապետյանն ունի բավականին բարձր անձնական ռեյտինգ (մոտ 85 տոկոսը դրական էր վերաբերվում): Բայց արդյո՞ք այդ 85 տոկոսը դրական կանդրադառնա Հանրապետականի վրա. իհարկե՝ ոչ»:
Պարոն Նավասարդյանը հույս հայտնեց, որ բացի ռեսուրսների պայքարից՝ քարոզարշավին կունենանք նաև գաղափարների պայքար:
