«Վրացական ընդդիմության հանրահավաքն արտոնված էր և անցնում էր օրենքի շրջանակներում: Կան փաստեր, որ ցուցարարները զինված են եղել փայտերով, և մեկ դեպք է եղել, երբ ցուցարարը ավտոմեքենա է կոտրել, ինչն անթույլատրելի է և հանդիսանում է խախտում»,- «Ռեգիոն» հետազոտական կենտրոնի կազմակերպած էլեկտրոնային հարցազրույցի ժամանակ կարծիք հայտնեց Human Rights Watch իրավապաշտպան կազմակերպության Հարավային Կովկասի ներկայացուցիչ Գեորգի Գոգիան:
Գոգիան նշեց, որ ինքն այս պահին չի կարող ասել, թե այդ խախտումը ինչ բնույթի է` վարչական, թե քրեական, բայց պարզ է, որ դա չի հանդիսանում մարդու իրավունքների խախտում: Նա ընդգծեց, որ անհրաժեշտ է մանրակրկիտ հետաքննել ռետինե փամփուշտների օգտագործման փաստը, թե ինչ հանգամանքներում և ինչպես են դրանք օգտագործվել:
«Միջազգային ստանդարտներով ցույցերը ցրելու նպատակով ռետինե փամփուշտների օգտագործումը հավասարազոր է սովորական փամփուշտների գործածմանը, ինչը թույլատրվում է բացառապես ծայրահեղ դեպքերում»,- մանրամասնեց Գոգիան և ընդգծեց, որ ձերբակալված են տասնյակ մարդիկ, ու անհրաժեշտ է ուսումնասիրել, թե որքանո՞վ են այդ ձերբակալություններն իրավաչափ, պահպանվե՞լ են, արդյոք, ձերբակալման բոլոր նորմերը. «Միայն այս ուսումնասիրություններից հետո հնարավոր կլինի այս գործողությունների իրավական գնահատականը տալ»: