Այսօր կառավարության նիստի ժամանակ քննչական կոմիտեի ղեկավար Աղվան Հովսեփյանի և արդարադատության նախարար Արփինե Հովհաննիսյանի միջև անհամաձայնություն առաջացավ: Արդարադատության նախարարը բերել էր դատախազության մասին օրենքում փոփոխություններ կատարելու վերաբերյալ նախագիծ, որը հակակոռուպցիոն քայլեր է ենթադրում։ Մասնավորապես, սահմանվում է, որ գլխավոր դատախազությունը իր կայքում յուրաքանչյուր տարի մինչև ապրիլի 1-ը պետք է հրապարակի հանցագործությունների քննության վերաբերյալ մանրամասն հաղորդում, բացահայտումների հետ կապված վերլուծություններ և այլ տեղեկություններ։
ՀՀ քննչական կոմիտեի նախագահ Աղվան Հովսեփյանն առաջարկեց վարչապետ Կարեն Կարապետյանին նիստի օրակարգից հանել օրակարգային առաջին հարցը, որը ներկայացրել էր ՀՀ արդարադատության նախարար Արփինե Հովհաննիսյանը: Աղվան Հովսեփյանը նշեց, որ նախագիծը հակասահմանադրական է, այն ներկայանցող մարմինն իրենց տեղյակ չի պահել մշակվող օրենքի մասին:
«Հայաստանում կա չորս քննական մարմին, որոնցից ոչ մեկին նախագիծը չի ուղարկվել», – ասաց Հովսեփյանը: – Այս նախագիծը բովանդակային առումով հակասում է ՀՀ Սահմանադրությանը: Այն կարող է կարգավորվել ոչ թե օրենքով, այլ՝ կառավարության որոշմամբ»:
ՀՀ կառավարության աշխատակազմի ղեկավար-նախարար Դավիթ Հարությունյանը նշեց, որ կառավարության նիստից առաջ տեղի ունեցած կոմիտեի նիստում ընդունված որոշումներն ուղարկվել են բոլոր գերատեսչությունների էլեկտրոնային փոստերին:
Նախագահի աշխատակազմի ղեկավար Արմեն Գևորգյանը ժամանակ խնդրեց լրացուցիչ քննարկելու եւ տարաձայնությունները վերացնելու համար։
Վարչապետը կատակեց, որ տարաձայնությունները երևի չեն վերանա, բայց 3 օր ժամանակ տվեց։ «Չեն վերանա, բայց քննարկենք»,- համաձայնեց արդրադատության նախարրը։
Մանրամասները՝ տեսանյութում:
