Մարտի սկզբին նախատեսված է Թուրքիայի նախագահ Ռեջեփ Թայիփ Էրդողանի այցը Ռուսաստան: Այցի վերաբերյալ, Սիրիայում ռուս-թուրքական համագործակցությունից և մի շարք այլ թեմաներից gazeta.ru-ին տված հարցազրույցի ժամանակ խոսել է Թուրքիայի նախկին արտգործնախարար Յաշար Աքիշը:
«Այժմ Թուրքիան բաց է Դոնալդ Թրամփի վարչակազմի հետ երկխոսության համար: Եվ քանի որ նման երխոսություն չի եղել Օբամայի վարչակազմի հետ, դա միջազգային հանրության մոտ այնպիսի զգացողություն է առաջացրել, որ Թուրքիան կրկին սկսում է շարժվել ԱՄՆ-ի ուղղությամբ՝ ի վնաս Ռուսաստանի հետ հարաբերությունների: Եվ նախագահի այցը պետք է ցույց տա, որ այդ կարծիքն անհիմն է: Հայտնի է՝ երբ հանդիպում են Պուտինը և Էրդողանը, նրանք ի զորու են լուծել շատ խնդիրներ բարձր մակարդակում»,-ասել է Աքիշը:
Անդրադառնալով քրդական հարցի վերաբերյալ տարաձայնություններին՝ նախկին ԱԳ նախարարը նշել է. «Այո, Ռուսաստանը մի երկիր է, որն աջակցել է քրդերի նպատկներին: Ամերիկացիները կապեր ունեն Դեմոկրատական միության քուրդ ջոկատայինների հետ Սիրիայում և ցանկանում են նրանց ռազմական թևն օգտագործել, որպեսզի գրավեն Ռաքքան: Ինչ վերաբերում է թուրքական մոտեցմանը, ապա Թուրքիան քրդերի դեմ չէ: Թուրքիան միայն հանդես է գալիս ընդդեմ այն խմբավորումների, որոնք ցանկանում են քրդերով չբնակեցված շրջանները դարձնել քրդական»,-ասել է նա և հավելել, որ քրդական հարցում Թուրքիան ամբողջությամբ փոխըմբռնում ունի Իրանի հետ:
Յաքիշի խոսքով՝ հարկավոր է ելնել նրանից, որ ՌԴ-ի և Ռուսաստանի շահերը չեն կարող ամբողջովին համընկնել: Սակայն կողմերը պետք է կենտրոնանան այն հարցերի վրա, որտեղ կա շահերի համընկնում՝ ընդլայնելով բանակցային հնարավորությունները:
