Համացանցում հայտնվել է տեսանյութ այն մասին, թե ինչպես է սերֆերին հրաշքով հաջողվել խուսափել մեծ, սպիտակ շնաձկան հարձակումից։ Այս մասին հայտնում է Daily Mail-ը։
Միջադեպը, որը տեսանկարահանել է Նոր Հարավային Ուելս նահանգի կառավարության անօդաչու սարքը, որը հետևում է սպիտակ շնաձկների տեղաշարժին, տեղի է ունեցել Բալինա քաղաքից ոչ հեռու։
Շնաձուկը լողացել է՝ հասնելով սերֆերից մեկ մետրից պակաս հեռավորության, մինչ մարզիկը սպասում էր հաջորդ ալիքին։ Թվում է, սկզբում շնաձուկը հետապնդել է մեկ այլ սերֆերի, որը տեսանյութում ալիք է որսում, իսկ այնուհետև ուշադրություն դարձրել մյուս տղամարդուն։
Տեսանյութում երևում է, թե ինչպես է շնաձուկը լողում տղամարդու ուղղությամբ, ով, հավանաբար, կասկած անգամ չի ունեցել վերահաս վտանգի մասին, սակայն արդյունքում շնաձուկը մտքափոխվել է և հանկարծակի փոխել ուղղությունը։
Պարբերականը նշում է, որ այդ շրջանում 2014 թվականից տեղի է ունեցել մարդկանց վրա շնաձկների առնվազն 11 հարձակում, որից 2-ը ողբերգական ավարտ են ունեցել։
