Ոստիկանական գործողությունների դեմ բողոքող մի խումբ ակտիվիստներ Գլխավոր դատախազության առջև անցկացրին բողոքի ակցիա: Ելույթներով հանդես եկան իրավապաշտպան Արթուր Սաքունցը և քաղաքացիական հասարակության ակտիվիստ Զարուհի Հովհաննիսյանը: Նրանք մեկ անգամ ևս դատապարտեցին ոստիկանության գործողությունները, որոնք արձանագրվել են Կոմիտաս 5 հասցեում և քաղաքապետարանի դիմաց:
Ակցիայի մասնակիցներին ուղեկցող ոստիկանները պատ շարեցին և թույլ չտվեցին, որ այն անցկացվի հենց Գլխավոր դատախազության դռների մոտ: Այդ պատճառով տեղի ունեցավ ընդհարում ոստիկանների և ակցիայի մասնակիցների միջև: Զարուհի Հովհաննիսյանը Երևանի փոխոստիկանապետ Վալերի Օսիպյանին տեղեկացրեց, որ դատախազությանը ցանկանում են նամակ հանձնել, ինչը և արեցին:
Ավելի ուշ ակցիայի մասնակիցները երթով շարժվեցին դեպի քաղաքապետարան, որտեղ արդեն մեկ ամսից ավել է՝ նստացույց են անում Վահագն Մինասյանը, Գոռ Առաքելյանը, Սուրեն Սահակյանը: Այստեղ ակտիվիստները պահանջեցին, որպեսզի գտնեն և բերման ենթարկեն «պապայի բալեքին»:
Քաղաքապետարանի մոտ նույնպես ոստիկանները պատ են շարել: Այսքանով ոստիկանության գործողությունների դեմ ակցիան կարելի է համարել ավարտված:
Լուսանկարը՝ Photolure-ի
