Եգիպտոսի նախկին նախագահ Հոսնի Մուբարաքը ուրախացել է՝ լսելով, որ բանակը իշխանությունից հեռացրել է իսլամիստ նախագահ Մուհամմադ Մուրսիին: Այս մասին «Ալ-Ահրամ» թերթին հաղորդել է Մուբարաքի փաստաբան Ֆարիդ Ալ-Դիբը:
Մուբարաքը ներկայում գտնվում է զինվորական հոսպիտալում, տնային կալանքի տակ՝ սպասելով գործի վերանայմանը, ըստ որի՝ նախկին նախագահը մեղադրվում է 2011թ. եգիպտական հեղափոխության ժամանակ խաղաղ ցուցարարների սպանությանը մասնակցելու մեջ:
«Ես իմ պաշտպանյալի մոտ եղել եմ հուլիսի 3-ին՝ մինչ Մուրսիին իշխանությունից զրկելու մասին բանակի հայտարարությունը: Մուբարաքը հեռուստացույցով ուշադիր հետևում էր լուրերին՝ այդ ժամանակ դեռևս բանտային հիվանդանոցից»,- ասել է փաստաբանը:
Նա նշել է, որ նախկին նախագահին հարցրել է, թե ինչ կարծիք ունի Մուրսիի մասին:
«Նա հիմար է, քանի որ ոչինչ չի կարողացել անել և նույնիսկ հստակ դիրքորոշում չի արտահայտել երկրում տեղի ունեցող իրադարձությունների վերաբերյալ»,- ասել է Մուբարաքը:
Ալ-Դիբը նշել է, որ նախկին նախագահը երջանիկ է եղել, երբ լսել է բանակի հայտարարությունը, սակայն մտավախություն է հայտնել ահաբեկչական խմբավորումների ակտիվացման կապակցությամբ:
«Այդ չարությունը պետք է ճնշել, դրա հետ հնարավոր չէ համագոյակցել»,- Մուբարաքի խոսքերը փոխանցել է փաստաբանը:
