Ադրբեջանը մտադիր է Հարավային Կորեայից գնել սպառազինման ժամանակակից տեսակների խոշոր խմբաքանակ: Սակայն պաշտոնական Սեուլը դեռևս տատանվում է՝ վախենալով ինչպես Ռուսաստանի բացասական արձագանքից, այնպես էլ ուժերի հավասարակշռության խախտումից՝ հաշվի առնելով Բաքվի և Երևանի միջև վեճը Լեռնային Ղարաբաղի հարցի շուրջ: Այս մասին հաղորդում է «Ռոսիյսկայա գազետա»-ն՝ վկայակոչելով «Հանգուկ Իլբո» հարավկորեական թերթը:
Պարբերականի տվյալներով՝ հարավկորեական սպառազինում և տեխնիկա ձեռք բերելու Ադրբեջանի հետաքրքրվածության մասին ասվել է Հարավային Կորեայի խորհրդարանականների պատվիրակության՝ Բաքու կատարած այցի ժամանակ: Մասնավորապես, Ադրբեջանը ցանկանում է Կորեայից ձեռք բերել երկու սուզանավ, էսմինեց, տրանսպորտային նավ, T-50 գերձայնային մարզական ինքնաթիռներ, անօդաչու թռչող սարք, ինքնագնաց հրետանային համակարգ К-9՝ 155 մմ տրամաչափով, և այլն: Գործարքը կնքվելու դեպքում դրա ընդհանուր արժեքը կկազմի առնվազն 3 միլիարդ դոլար:
Ինչպես նշում է «Հանգուկ Իլբո»-ն, զենքը Բաքվին առաջին հերթին անհրաժեշտ է Երևանին դիմակայելու համար: Բացի այդ, ուժեղացնելով զինված ուժերը՝ Ադրբեջանը կմեծացնի նավթագազային հարուստ հանքերի անվտանգության ապահովման հնարավորությունը:
Այս բոլոր առաջարկներն արդեն փոխանցվել են Հարավային Կորեայի կառավարությանը, որը դեռևս չի շտապում բանակցություններ սկսել Ադրբեջանի հետ զենքի մատակարարման վերաբերյալ:
Այս կապակցությամբ թերթը մի քանի պատճառներ է ներկայացնում: Առաջին հերթին զենքի նման խոշոր խմբաքանակի մատակարարումը կհանգեցնի տարածաշրջանում ուժերի հավասարակշռության փոփոխության և կընկալվի որպես Սեուլի «խաղ» Բաքվի կողմից տարածքային վեճում, որին կորեացիները չեն ցանկանում միջամտել:
Կորեացի զինագործները կցանկանային զենքի նման խոշոր խմբաքանակ արտահանել, որը թույլ կտար ոչ միայն խոշոր գումար վաստակել, այլև կամրապնդեր Հարավային Կորեայի իմիջը՝ որպես սպառազինության համաշխարհային մատակարար:
Թերթի փոխանցմամբ՝ հարավկորեական ԱԳՆ-ն բացասաբար է վերաբերվել Ադրբեջանին զենք վաճառելու հնարավորությանը և Կորեայի պաշտպանության նախարարությանը խորհուրդ է տվել զսպվածություն և զգուշություն ցուցաբերել:
Այս կապակցությամբ Կորեայում տեղեկատվություն է հայտնվել այն մասին, որ երկրի ռազմական գերատեսչության ղեկավարը պատահաբար չի մերժել Ադրբեջան այցելելու Բաքվի առաջարկը՝ պատճառաբանելով ծանրաբեռնվածությունը: Թերթը պնդում է, որ Բաքու կմեկնի նախարարի տեղակալը, որը կքննարկի նաև զենքի մատակարարման հարցը:
«Հանգուկ Իլբո»-ն նշում է, որ Սեուլը զգուշության մեկ այլ պատճառ ևս ունի: Հարավային Կորեան չի ցանկանում փչացնել հարաբերությունները Ռուսաստանի հետ, որը հատուկ շահեր ունի տարածաշրջանում, ինչպես նաև իր դիրքորոշումը Հայաստանի և Ադրբեջանի հետ հարաբերություններում և Լեռնային Ղարաբաղի հարցում:
