Ադրբեջանական Day.az կայքին տված հարցազրույցի ժամանակ ռուսաստանյան հասարակական-քաղաքական հետազոտությունների կենտրոնի քաղաքագետ Վլադիմիր Եվսեևն անդրադարձել է ղարաբաղյան հակամարտության կարգավորմանը.
«Համաշխարհային հակամարտությունների փորձը ցույց է տալիս, որ միջազգային հանրությունը սովորաբար մեկ ամսից ավելի ժամանակ չի տրամադրում ռազմական ճանապարհով հակամարտությունների կարգավորմանը: Դրա վառ օրինակն Իսրայելն է, որը փորձում էր ուժային մեթոդով լուծել Գազայի հատվածի խնդիրը: Նույնը չի կարելի ասել Լիբիայի պարագայում, քանի որ դա այլ տիպի խնդիր է:
Ելնելով դրանից` մեկ ամսվա ընթացքում ադրբեջանական կողմը կարող է գրավել Լեռնային Ղարաբաղի որոշ շրջաններ: Դա մասնավորապես վերաբերում է ցածրադիր շրջաններին: Միևնույն ժամանակ մեկ ամսում անհնար կլինի ամբողջությամբ լուծել Լեռնային Ղարաբաղի խնդիրը: Դրա համար էլ խնդիրը չի կարող լուծվել ռազմական ճանապարհով:
Ղարաբաղյան պատերազմի վերսկսման դեպքում Ռուսաստանը չեզոք դիրք կզբաղեցնի: Ռուսաստանը Գյումրիում ունի ռազմաբազա, և այն որոշակի պարտականություններ է կրում Հայաստանի պաշտպանության առումով: Սակայն այդ բազան որևէ պարտականություն չի կրում` կապված Լեռնային Ղարաբաղի պաշտպանության հետ:
Ինձ անհանագստացնում է այն, որ Գյումրիի ռուսական բազայում ծառայում են մեծ թվով հայկական ծագում ունեցող զինծառայողներ: Հենց այդ պատճառով էլ բավական բարդ կլինի կանխատեսել, առավել ևս՝ վերահսկել այդ, իբրև թե, ռուս զինծառայողների վարքը` Ղարաբաղում պատերազմի վերսկսման դեպքում: Դա նույնպես Մոսկվային ստիպում է չեզոք դիրք գրավել պատերազմի վերսկսման պարագայում:
Հնարավոր է, որ հայաստանյան որոշ ուժեր փորձեն Ռուսաստանին ներքաշել զինված հակամարտության մեջ, սակայն ես հուսով եմ, որ Մոսկվան կկարողանա ընդդիմանալ այդ փորձերին, քանի որ դա չի համապատասխանում նրա ազգային շահերին»:
Հիշեցնենք, որ օրեր առաջ էլ մեկ այլ ռուս փորձագետ, քաղաքական գիտությունների թեկնածու Անդրեյ Կազանցևը հայտարարել էր, որ պատերազմի վերսկսման դեպքում հակամարտող կողմերը կհայտնվեն մեծ ճնշման տակ: Նա նշել էր, որ, ինչպես ցույց է տալիս համաշխարհային փորձը, այդպիսի հակամարտությունների կարգավորումը կարող է ձգձգվել տասնամյակներով, ինչպես, ասենք, Կիպրոսի պարագայում է:
