Թուրքական Cumhuriyet թերթի փոխանցմամբ, Թուրքիայի արտգործնախարար Ահմեդ Դավութօղլուն, մասնակցելով հաղորդումներից մեկին, անդրադարձել է Թուրքիայի արտաքին քաղաքականության խնդիրներին.
«Որքանով որ այս գարունը կարելի է որակել որպես արաբական, այնքանով էլ դա կարելի է որակել որպես թուրքական գարուն: Թուրքիան շատ հաջող հանձնեց արտաքին քաղաքականության այդ տեստը:
Երբ մենք առաջ քաշեցինք «զրո խնդիր հարևանների հետ» քաղաքականություը, դա Թուրքիային օգնեց փոխելու իր իմիջը: Դրա համար էլ այդ քաղաքականությունը կշարունակվի նաև այսուհետ:
Վերջին 8 տարիների ընթացքում Թուրքիան տարածաշրջանի երկրների ժողովուրդների ու ղեկավարների շրջանում վերածվել է արտաքին դերակատարի:
Թուրքիան ԱՄՆ նման ցանկանում է, որ Մերձավոր Արևելքում խաղաղություն տիրի: Դրա համար անհրաժեշտ է, որ Իսրայելը նորմալ դիրքորոշում զբաղեցնի: Բոլորի համար մեկ օրենք կա, իսկ Իսրայելի համար` մեկ այլ:
Ինչ վերաբերում է ԵՄ-ի հետ Թուրքիայի հարաբերություններին, ապա մենք անհանգստացած ենք այդ կապակցությամբ: ԵՄ-ը խոչընդոտներ է ստեղծում մեր անդամակցության ճանապարհին, բայց եթե Թուրքիան անդամակցի ԵՄ-ին, ապա իր ներդրումը կունենա այդ միությունում»:
Հիշեցնենք, որ վարչապետ Էրդողանի գլխավորած «Արդարություն ու զարգացում» կուսակցության (ԱԶԿ) մինչև 2023 թվականը Թուրքիայի անելիքների մասին գրքույկում նշված էր, որ Թուրքիան շարունակելու է ԵՄ-ին լիիրավ անդամակցությանն ուղղված ռազմավարական քայլերը:
ԵՄ-ին լիիրավ անդամակցությունն Անկարային հնարավորություն կընձեռի ավելացնելու սեփական ազդեցությունը տարածաշրջանային և գլոբալ խնդիրների հարթման ժամանակ:
