Ամերիկայի Ավետարանչական եկեղեցու ներկայացուցիչ Լուսինե Օհանյանն այսօր լրագրողների հետ հանդիպմանը, պարզաբանելով անցյալ տարի կազմակերպված «Շողիկ» ճամբարում տեղի ունեցած միջադեպի մասին, ասաց, որ իրենք ունեն ցանկությունների թերթիկ, որտեղ երիտասարդներն իրենք են դեռևս 2011 թվականին առաջարկել, որ ճամբարում անցկացվեն սեռական դաստիարակության մասին սեմինարներ: Հաջորդ տարի, ընդառաջելով 250 երիտասարդների խնդրանքին, անցկացվել են սեռական դաստիարակության մասին սեմինարներ: «Քանի որ ճամբարում չկա նման մասնագետ, մենք մասնագետ ենք հրավիրել և հաջորդ տարի ծրագիրը ներկայացրել երիտասարդներին: Արձագանքը բավականին լավ է եղել, երեխաների մեծամասնությունը կողմ է եղել»,- ասաց նա:
Նա նշեց, որ ճամբարում 250 երեխա է եղել, և տարբեր դասընթացներ են անցկացվել:
Ասուլիսի մյուս բանախոսը՝ «Քայքայիչ պաշտամունքից տուժածների օգնության կենտրոն», ՀԿ տնօրեն Ալեքսանդր Ամարյանը հակադարձելով ասաց, որ եթե դա այդպես եղած լիներ, հոյակապ կլիներ, սակայն մի կողմ կա, որի մասին տիկին Օհանյանը չխոսեց: Ըստ նրա՝ ճամբարում էրոտիկ բնույթի դասընթացներ չպիտի անցկացվեին, քանի որ ճամբարը հանրակրթական ուսումնական կենտրոն չէ:
Բացի դրանից՝ Ալ. Ամարյանը խոսեց նաև Ավետարանչական եկեղեցում կատարված խախտումների մասին՝ սկսած փողերի լվացումից մինչև մարդկանց աշխատանքից անհիմն ազատելը:
Այժմ ՀԿ ղեկավարի ձեռքի տակ են մի շարք փաստաթղթեր, մի քանի ձայնագրություններ էլ արդեն ոստիկանությունում են:
