ԼՂՀ ինքնապաշտպանական ուժերի առաջին հրամանատար Արկադի Կարապետյանը նախկինում «Առաջին լրատվական»-ի հետ զրույցում կարծիք էր հայտնել, որ բողոքի ալիք բարձրացրած ազատամարտիկները հաջողության կհասնեն միայն մի դեպքում՝ եթե միավորված գործեն:
Նշենք, սակայն, որ ազատամարտիկներն այսօր երկու թևի են բաժանված․ մի մասը կարծում է, որ երկրին համակարգային փոփոխություններ են անհրաժեշտ, մյուս մասն էլ ուզում է միայն բարելավել սոցիալական պայմանները:
Այսօր Արկադի Կարապետյանը մեզ հետ զրույցում նշեց, որ ազատամարտիկները չեն միավորվում, որովհետև չեն վախենում Աստծուց. եթե վախենային, ապա անպայման կմիավորվեին մեկ ընդհանուր գաղափարի շուրջ․ «Առհասարակ ասեմ՝ եթե մարդ քրիստոնյա չէ, նա լավ զինվոր լինել չի կարող,ամենալավ զինվորը քրիստոնյա զինվորն է»:
Ուզում եմ նաև ասել, որ նույնիսկ 88 թվի պատերազմը, որ մենք ենք հաղթել ենք՝ Աստված է մեզ այդ հաղթանակը տվել: Եթե չդառնանք Աստծուն, մյուս պատերազմը տանուլ ենք տալու: Այն ժամանակ սովետ էր, անհավատ էինք, այսպես ասեմ՝ Աստված մեզ «վ կրեդիտ» հաղթանակ տվեց: Հիմա եկեղեցին գործում է, ամեն հնարավորություն ունենք դեպի հաղթանակ շրջվելու, դեպի Աստված շրջվելու, և եթե դա չանենք, ապա մյուս պատերազմը տանուլ կտանք․ ոչնչի էլ չենք հասնի, ինչ ձևով ուզում ենք պայքարենք, և ինչ պահանջ ուզում են դնեն»:
Արկադի Կարապետյանի խոսքով՝միակ բանը, որ կարող է միացնել իրենց, Աստծո հավատն է , ուրիշ ոչ մի բան․ «Թվում է, թե երկու թևն էլ կռված տղերք են, պետք է որ նույն բանը ուզեին, բայց նույն բանն ուզել չեն կարողանա, որովհետև Աստծուց չեն վախենում»:
Մեր այն հարցին, թե, իր գնահատմամբ, ո՞ր թևն է ճիշտ, Արկադի Կարապետյանը պատասխանեց․ «Ես արդեն ասացի՝ մեկը առանց մյուսի չի լինում, նույնիսկ գողականներն են ասում՝ ճիշտը մեկն է: Ես ասում եմ՝ եթե այդ ճանապարհով չեն գնում, ուրեմն ո՛չ մեկն է ճիշտ, ոչ էլ մյուսը, որովհետև բողոքականությունը լավ բանի չի բերում:
Բողոքականությունը՝ ընդհանուր իմաստով նկատի ունեմ․ Եվրոպայում բողոքական եկեղեցին հաղթեց, հիմա նույն գոմիկների հարսանիքն են անում:
Որոշ ժամանակ հետո այս բողոքների ալիքի վրա Հայաստանում էլ գոմիկների հարսանիք կանեն, մանավանդ հիմա օրենք են ուզում ընդունել և այլն: Ասածս այն է, որ հիմքը, որի վրա կարելի է հաղթանակ տոնել, չկա: Հենա 20 տարի է՝ բողոքում ենք, ոչնչի չենք հասնում, որովհետև բողոքականությունն է, այլ միացնող բան չկա, որովհետև ամեն մեկն իր մտածածն է առաջ քաշում, մինչև չշրջվենք, ոչնչի էլ չենք հասնի»:
Ի դեպ, մենք հետաքրքվեցինք նաև, թե երբ ազատամարտիկները խոստացածի պես կգնան Արցախ և կոչ կանեն այնտեղի ազատամարտիկներին՝ միանալ իրենց, գիտի՞, թե՞ ոչ: Արկադի Կարապետյանը պատաասխանեց․ «Ո՛չ, հավատացեք, որ ես հիմա շատ ավելի լուրջ խնդիրներ ունեմ, քան իրենց պահանջները, հետո՝ ու՞մ միանամ, մի թևն այս կողմն է, մյուսն այն»:
