Ընթացիկ տարում Ֆինանսական համակարգի հաշտարարի գրասենյակ ստացվել է 1200-ից ավելի դիմում: Այս մասին «Առաջին լրատվական»-ին տեղեկացրեց Ֆինանսական համակարգի հաշտարարի գրասենյակի պահանջներն ընդունող և քննող խմբի ղեկավար Հրանուշ Աղայանը:
2010 թվականին հաճախորդների բողոքների թիվը 2009-ի նկատմամբ աճել է 70%-ով, իսկ քննված պահանջների թիվը` 93%-ով: 2011թ. վերոնշյալ ցուցանիշների համեմատական աճը 2010թ. համապատասխան ցուցանիշների նկատմամբ կազմել է. բողոքները՝ 25%, քննված պահանջները՝ 31%: 2012թ. ստացված բողոքների ու պահանջների թիվը 2011թ. նկատմամբ աճել է, համապատասխանաբար, 63.2%-ով և 172.2%-ով: 2012-ի ընթացքում ստացված բողոքների թիվը հասել է 1549-ի:
«Նման աճը գրասենյակի կողմից շարունակաբար իրականացվող՝ հանրության իրազեկման արշավի, ինչպես նաև նոր ֆինանսական ծառայությունների ներդրման արդյունք է: Ֆինանսական համակարգի հաշտարարի գրասենյակը յուրաքանչյուր օր այցելությունների, զանգերի, էլեկտրոնային նամակների տեսքով ստանում է ֆինանսական կազմակերպությունների դեմ ուղղված բազմաթիվ բողոքներ»,- նշեց Հրանուշ Աղայանը:
Նրա տվյալներով՝ ստացված բողոքների մեջ զգալի մաս են կազմում ԱՊՊԱ-ի հետ կապված բողոքները, երբ հաճախորդները համաձայն չեն եղել գնահատված վնասի չափի հետ: Պահանջներն ընդունող և քննող խմբի ղեկավարն առանձնացրեց նաև վարկերի, ավանդների հետ կապված բազմաթիվ բողոքները` կապված տոկոսների հաշվարկի հետ անհամաձայնության, վերադասակարգման, տույժերի կիրառման և այլնի հետ:
«Հաշտարարի գրասենյակը, նախ և առաջ, կարևոր դեր ունի Ֆինանսական կազմակերպությունների հաճախորդների իրավունքների պաշտպանության ոլորոտում: Ֆինանսական համակարգի հաշտարարի կողմից պահանջն ընդունելու, քննելու և որոշում կայացնելու կապակցությամբ հաճախորդից որևէ վճար չի գանձվում, իսկ գործի քննությունը տևում է 14-ից 28 աշխատանքային օր»,- ասաց Հրանուշ Աղայանը:
Ֆինանսական համակարգի հաշտարարի գրասենյակի վիճակագրության համաձայն՝ հօգուտ հաճախորդների, լուծվել են գործերի մոտավորապես 63 %-ը: Ըստ Հրանուշ Աղայանի՝ քննության անվճար լինելը, կարճ ժամկետը և պարզ ընթացակարգը խրախուսում են հաճախորդներին՝ ընտրել Ֆինանսական հաշտարարի գրասենյակը՝ որպես վեճերի լուծման այլընտրանքային մարմին: