«Էլիտայի ոչ մի ներկայացուցիչ նոտարական գործարք կատարելիս, որպես կանոն, նույնիսկ պետական տուրքը չի վճարում, էդ ձեզ ասեմ՝ իմանանք»,- այսօր հայտարարեց արդարադատության նախարարության նոտարիատի բաժնի նախկին պետ Մարիամ Գաբոյանը:
Այնուամենայնիվ, նա հրաժարվեց անուններ և կոնկրետ փաստեր նշելուց, պատճառաբանելով, թե նման հայտարարություն անում է նոտարների ընդհանուր կարծիքից ելնելով:
Հարցին՝ արդյո՞ք վերջերս վարչապետի կողմից նոտարիատի վերաբերյալ եղած քննադատությունն է կադրային փոփոխության պատճառ հանդիսացել, Գաբոյանը պատասխանեց. «Ես դա շատ բաների հետ եմ կապում, ես ուղղվածություն եմ տեսնում, մանավանդ՝ վերջին երեք ամիսների ընթացքում: Դա ուղղվածություն է, անձնական բնույթի ինչ-որ բան է, որի արմատները ես չեմ հասկանում: Այս ուղղվածությունը բոլորի կողմից է իմ անձի դեմ»:
Գաբոյանը նշեց, թե եթե վերահսկողությունը լավ չի իրականացվել, ապա ինքն այժմ չկա, և թող մյուսները լավ աշխատեն:
Գաբոյանը նաև հայտարարեց, որ ինքը համաձայն չէ այն դիտարկումների հետ, թե նոտարական համակարգում կոռուպցիա կա: Նա նշեց, որ կոռուպցիան վերաբերում է միայն պաշտոնատար անձանց, իսկ նոտարը պաշտոնատար անձ չէ. «Եթե 5000 դրամի փոխարեն գանձվել է 7000 դրամ, ապա դա ոչ թե կոռուպցիա է, այլ սպառողների շահերի խախտում: Ոչ մի կամայականություն չկա, ինչ սակագին որ գրված է, դրա շրջանակներում էլ աշխատում են նոտարները: Ես պնդել եմ, պնդում եմ և էլի կպնդեմ, որ այս համակարգում ոչ մի կոռուպցիա, ոչ մի կամայականություն չկա»:
Ասուլիսին ներկա էին նաև նոտարների գործունեությունից տուժած քաղաքացիներ, որոնք, վրդովված Գաբոյանի խոսքերից, բարձրաձայնեցին, թե վերջինս է ղեկավարում նոտարական համակարգում տիրող անօրինությունները և պետք է քրեական պատասխանատվության ենթարկվի:
«Ես ամենայն պատասխանատվությամբ հայտարարում եմ, որ դուք համագործակցում եք դատարանների հետ: Այսինքն` դատավորները, տեսնելով նոտարների կողմից կատարված ակնառու կեղծիքները, պետք է մաս անջատեին, և այդ գործը համապատասխան մարմնում պետք է գնար քննության: Սակայն նրանք թելել են ձեր թելը, որովհետև դուք, լինելով տանիք, հրահանգներ եք ուղարկել այդ դատավորներին: Ձեր և այդ դատավորների շնորհիվ է, որ այսօր Եվրադատարաններում մեր երկիրը գտնվում է ամենածանր վիճակում, մեր երկրի պատիվն ու հեղինակությունն ընկնում է այնտեղ: Այս տիկինը տանիքն է նոտարների կողմից կատարված կեղծիքների»,- հայտարարեց նոտարական ծառայությունից տուժածի լիազոր ներկայացուցիչ Մանյա Արզումանյանը: