Նոյեմբերյանի զորամասում մայիսի 15-ին ծառայակցի գնդակից սպանված ժամկետային զինծառայող Լյուքս Ստեփանյանի դիակի դատաբժշկական փորձաքննության եզրակացությունը դեռ պատրաստ չէ, նախաքննությունը շարունակվում է արդեն չորս ամիս, ինչն էլ անհանգստացնում է նրա ընտանիքին ու հարազատներին:
Այս մասին այսօրվա համարում գրում է «Հրապարակ» օրաթերթն ու հավելում, որ թեև այս դեպքն առանձնանում է շատ սպանություններից և Սեյրան Օհանյանի ուշադրության ներքո է գտնվում, սակայն այդ հանգամանքը չի սփոփում նրանց, նրանք մտահոգվելու պատճառ ունեն, ինչպես իրենք են ասում՝ էս երկրից ամեն ինչ սպասում են: Մտահոգությունը համալրվել է ևս մեկ հանգամանքով, «ժողովուրդ» թերթի երեկվա հրապարակմամբ, ըստ որի՝ Լյուքս Ստեփանյանի սպանության մեջ կասկածվող Գավիթ Խաչատրյանին տարել են հոգեբուժարան ու հետազոտել, ինչի մասին թերթին հայտնել է նրա եղբայրը՝ Վարդան Խաչատրյանը: Լյուքս Ստեփանյանի մերձավորները կասկած են հայտնում, որ այդ քայլով փորձ է արվում նրա հոգեվիճակի վերաբերյալ այնպիսի «փաստեր» ձևակերպել, որոնք կարող են ազդել արդար դատաքննության, հետագա պատասխանատվության վրա: Երեկ այս մասին թերթի լրագրողին հայտնել է խմբագրություն զանգահարած հայրը՝ Իշխան Ստեփանյանը:
Թերթը տեղեկացել է նաև, որ Իշխան Ստեփանյանը հրաժարվել է պետության աջակցությունից: Նրանց 2 միլիոն 450 հազաի դրամ գումար է փոխանցվել գերեզմանի կառուցման աշխատանքների համար, սակայն հայրը համառորեն հրաժարվում է այդ աջակցությունից: Նշենք, որ նա հետ էր ուղարկել նաև որդու թաղման օրն իրեն փոխանցած 3 հարյուր հազար դրամը: Որդու քառասունքի արարողությանը ևս պաշտպանության նախարարությունից ուղարկվել էր 5 հարյուր հազար դրամ, որը պետական աջակցություն է և տրվում է բոլոր զոհված զինվորներին, սակայն անգամ դա չէր վերցրել: «Ոչ մի գումար ինձ չի սփոփում, իմ աչքին չի երևում այդ օգնությունը, անկախ նրանից՝ ես դրա կարիքն ունեմ, թե չէ… Քանի դեռ չի եղել իմ որդու դատը, քանի դեռ մեղավորները պատասխաննթյուն չեն կրել, ու ես չեմ համոզվել, որ ես երկրում արդար դատաստւսն լինում ա, ես էս պետությունից ոչ մի կոպեկ էլ չեմ վերցնի»,- թերթի հետ զրույցում ասել է որդեկորույս հայրը:
Հոդվածն ամբողջությամբ՝ կարդացեք «Հրապարակ»-ի այսօրվա համարում:
Լուսանկարը՝ Photolure-ի
