Եվրամիության հետ Ասոցացման համաձայնագրի ստորագրման նախաշեմին Ռուսաստանը սկսել է տնտեսական պատժամիջոցներ կիրառել իր հարևան Ուկրաինայի նկատմամբ: Եվ Եթե սկզբում ՌԴ-ն արգելեց ուկրաինական Roshen քաղցրավենիքի ներմուծումը Ռուսաստան, ապա հետագայում պաժամիջոցներն էլ ավելի խորացան: Կպատժվի՞ Հայաստանն այս կերպ, թե՞ քանի որ Ուկրաինան ստորագրում է, Հայաստանը՝ նախաստորագրում, պատժամիջոցներ չեն լինի։ Այս հարցի շուրջ «Առաջին լրատվական»-ը զրուցեց Ռուսաստանի «Ազգային էներգետիկ անվտանգության հիմնադրամի» հիմնադիր և գլխավոր տնօրեն Կոնստանտին Սիմոնովի հետ:
Նրա խոսքերով՝ Հայաստանի և Ուկրաինայի համեմատությունն այս պարագայում այնքան էլ կոռեկտ չի լինի, որովհետև դրանք, նրա պնդմամբ, միանգամայն տարբեր պատմություններ են. «Բնականաբար, ուկրաինական ապրանքների հետ պատմությունը կապված է Ուկրաինայի՝ Եվրամիության հետ Ասոցացման համաձայնագիր կնքելու ցանկությամբ, դա ակնհայտ է, բայց հարցն այն է, որ եթե Ուկրաինային դեռևս շատ վաղուց կանչում են Մաքսային միություն, ապա Հայաստանի դեպքում դա անհնար է։ Մենք ընդհանուր սահման չունենք՝ ես չեմ էլ պատկերացնում, թե ինչպես պետք է Հայաստանը անդամագրվի, այդ իսկ պատճառով այս երկու պատմությունները միանգամայն տարբեր են:
Ուկրաինական կոնֆլիկտը, կրկնում եմ, կապված է Եվրամիության հետ Ասոցացման համաձայնագրի ստորագրման նրա ցանկությամբ, բայց ես դա չէի համեմատի Հայաստանի հետ։ Ոչ ոք Հայաստանին չի կանչում Մաքսային միություն, առավել ևս այն դեպքում, երբ դա տեխնիկապես անհնար է, ուրեմն Հայաստանի նկատմամբ ոչ մի վերջնագիր Ռուսաստանը չի դրել և չի էլ դնի»:
Անդրադառնալով Ռուսաստանի կողմից Ադրբեջանին մոտ մեկ միլիարդի զենք վաճառելուն, Կ․ Սիմոնովը նշեց, որ դա ևս պետք չէ կապել Հայաստան-ԵՄ ստորագրվելիք Ասոցացման համձայնագրի հետ. «Այն, որ Ռուսաստանն Ադրբեջանին զենք է վաճառում, ընդհանրապես կապ չունի. Ռուսաստանը Հայաստանին էլ է վաճառում զենք։ Իսկ այն, որ վաճառում է Ադրբեջանին, ուղղակի գործարք է, որից Ռուսաստանը գումար է ստանում, մանավանդ որ Ադրբեջանում դեռ բավականին գումար կա։ Ադրբեջանին զենք վաճառելը բոլորովին էլ չի նշանակում հրաժարվել Հայաստանի անվտանգությունն ապահովելուց։ Ընդհանրապես, աշխարհում շատ այդպիսի օրինակներ կան, և պետք չէ մեկը մյուսի հետ կապել»:
