Բրիտանիայի արքայազններ Ուիլյամը և Հարրին որոշել են իրենց 20 տարի առաջ մահացած մոր ամբողջ հասակով հուշարձանը պատվիրել: Այս մասին հայտնում է BBC-ն:
Հուշարձանը նախատեսվում է կանգնեցնել Քենսինգթոնյան պալատի այցելությունների համար բաց տարածքում, որտեղ արքայադուստր Դիանան բավական ժամանակ է անցկացրել:
«Ժամանակն է նրա դրական ազդեցությունն ընդունելու: Մեր մայրը այնքան հոգիների է դիպել… Հուսով ենք՝ արձանը Քենսինգթոնյան պալատի բոլոր այցելուներին կօգնի մտածել նրա կյանքի և ժառանգության մասին»,- ասվում է Դիանայի որդիների հայտարարության մեջ:
Ներկայումս քանդակագործը դեռ ընտրված չէ, սակայն թագավորական ընտանիքի ներկայացուցիչը վստահեցրել է, որ հուշարձանի աշխատանքները մոտ ժամանակներս կսկսվեն:
Քանդակագործին կընտրի 6-հոգանոց կոմիտեն, որոնցից մեկը հանգուցյալի քույրն է՝ Սառա Մաքքորքուոդեյլը:
Հայտնի է նաև, որ Եղիսաբեթ II թագուհին կողմ է մոր հիշատակը հարգելու իր թոռների մտադրությանը:
Արքայադուստր Դիանան մահացել է 1997թ. օգոստոսի 31-ին 36 տարեկանում՝ Փարիզի Ալմա հրապարակի տակ գտնվող ստորգետյնա թունելում տեղի ունեցած ավտովթարից:
Արքայադստեր հետ զոհվել էին նրա ընկեր Դոդի ալ-Ֆայեդը և վարորդ Անրի Պոլը: Նրանք տեղում մահացել էին, իսկ Դիանային հասցրել էին Սալպետրիեր հիվանդանոց, որտեղ նա մահացել էր երկու ժամ անց:
