Այսօր ԱԺ-ն քննարկման դրեց նաև կառավարությանը անվստահություն հայտնելու Դաշնակցության հարցապնդումը: ՀՅԴ պատգամավոր Արմեն Ռուստամյանը նշեց, որ իրենց նախաձեռնությունը պայմանավորված է ՀՀ կառավարության նախաձեռնած մի շարք իրավական ակտերի՝ սահմանադրությանը և օրենսդրությանը համապատասխանության մասով, գնաճի զսպման կարողության մասով, հայրենադարձության խթանման և արտագաղթի կանխման արդյունավետության մասով:
«Կառավարության ձախողումները բոլոր այս ուղղություններով մեր կողմից փաստելու համար հիմք են ծառայել կոալիցիոն հուշագրի 22 առաջնահերթությունները, կառավարության հաստատած ծրագրերը, նախանշած ծրագրերը և կատարած քայլերը: Իսկ ստացված պատասխանը կառավարության կողմից ոչ միայն չի փարատում մեր հարցապնդման մեջ արծարծված գնահատականներն ու մտահոգությունները, այլև ամրապնդում և հաստատում է դրանք, ավելին՝ առաջանում է լուրջ հակասություն։ Այնպիսի տպավորություն է, որ կառավարությունը այս երեք տարիների ընթացքում ասել է մի բան, արել է մի բան, իսկ մտածել է բոլորից թաքուն բոլորովին այլ բան, ամեն ինչ նախկին երկու կառավարությունների վրա է բարդվել, դա արադարացի չէ»,- ավելացրեց Արմեն Ռուստամյանը:
Ֆինանսների նախարար Վաչե Գաբրիելյանն արդարացավ, որ կա էվոլյուցիա, որ կառավարությունը «վերապրել է մի շատ մեծ գործոն, որը կոչվում է համաշխարհային ֆինասատնտեսական ճգնաժամ», ինչը էական փոփոխություն մտցրեց նաև բոլոր զարգացած և հզոր երկրների տնտեսվարման կարգերում ու ստիպեց բոլորին նորովի նայել այն իրականությանը, որը գոյություն ուներ:
Ինչևէ, ՀՀ կառավարությանն անվստահության հայտնելու ՀՅԴ-ի հարցապնդումը դրվեց քվեարկության և 13 դեմ, 10 կողմ ձայների հարաբերակցությամբ չընդունվեց: Ձեռնպահ չկար։
Հիշեցենք, որ աշխատանքային օրվա սկզբին ԱԺ-ում ներկա էր 86 պատգամավոր: