Քաղաքագետ Ալեքսանդր Իսկանդարյանը լիահույս է, որ Ադրբեջանում գերի պահվող Հակոբ Ինջիղուլյանը ազատ կարձակվի:
Օգոստոսի 22-ին լրագրողների հետ հանդիպմանը, սակայն, Իսկանդարյանը դժվարացավ հստակ պատասխանել՝ ինչ քայլեր են սպասվում:
«Անչափ դժվար է այդ հարցին պատասխանել՝ էթիկայի կանոններից ելնելով: Այդ տղայի հարազատներին հանդիպել եմ, գիտեմ՝ նրանք, մեղմ ասած, այնքան էլ լավ չեն ընդունում Հակոբի մասին գրվող լուրերը: Ես կգերադասեմ լռել, բայց ստել չեմ ուզում»,- ասաց Իսկանդարյանը: Ապա նշեց, որ այս ուղղությամբ կատարվող ողջ աշխատանքը փակ է, միջազգային կազմակերպությունները գաղտնի ռեժիմով են աշխատում, ուստի ինքը կարող է միայն արտաքին ազդակներից ելնելով ենթադրություններ անել: «Կարծում եմ՝ զինվորի հանձնումը կկատարվի, մնում է հուսալ և աղոթել, որ այս ուղղությամբ կատարվող աշխատանքը հաջողվի»,- ասաց նա:
Կարմիր Խաչի Բաքվի գրասենյակի ներկայացուցիչները օգոստոսի 20-ին հանդիպում են ունեցել Ադրբեջանի կողմից գերության մեջ պահվող՝ Արցախի ՊԲ ժամկետային զինծառայող Հակոբ Ինջիղուլյանի հետ: Գերուն տեղեկություն է փոխանցվել նրա ընտանիքի մասին և հակառակը: ԿԽՄԿ-ից Ինջիղուլյանի հարազատներին վերջինից նամակ են փոխանցել, որում զինվորը բարևներ է ուղարկել, գրել, որ լավ է, իրեն այնտեղ լավ են վերաբերվում: Հարազատները հաստատել են՝ նամակը գրել է Հակոբը, իր ձեռագիրն է:
Հիշեցնենք, որ օգոստոսի 7-ի լույս 8-ի գիշերը` ժամը 3:00-ի սահմաններում, ծառայությունն իրականացնելու ժամանակ, ըստ նախնական տեղեկությունների՝ տեղանքում չկողմնորոշվելու հետևանքով 1991թ. ծնված շարքային զինծառայող Հակոբ Գևորգի Ինջիղուլյանը, հատելով ղարաբաղա-ադրբեջանական սահմանը, հայտնվել է հակառակորդի պահպանության տակ գտնվող տարածքում:
Լուսանկարը՝ PanARMENIAN Photo-ի