Արդարադատության նախարարության նոտարիատի բաժնի նախկին պետ Մարիամ Գաբոյանն այսօր անդրադարձավ այն տեղեկություններին, թե իր՝ պաշտոնից ազատվելու պատճառը ԱՄՆ-ում գործունեություն ծավալած՝ հայտնի «օրենքով գող» Պզոյի գլխավորած հանցավոր խմբի հետ կապն է:
«Հազար անգամ ասել եմ, հիմա էլ կրկնում եմ. ես ընդհանրապես նոտար չեմ, ես նոտարական գործունեություն չեմ իրականացնում, ես 32 տարի աշխատել եմ նոտարներին ստուգող: Ես երբեք կնիք չեմ ունեցել, գործարքներ չեմ արել, նույնիսկ քաղաքացու ստորագրության իսկությունը հաստատելու իրավունք չունեմ: Հետևաբար, որևէ քաղաքացի՝ կուզի դատված լինի, կուզի ՀՀ քաղաքացի կամ ԱՄՆ քաղաքացի լինի, չի կարող ինձ մոտենալ և խնդրել, որ գործարք կատարեմ իր համար: Նա կարող է ընդամենը ասել, որ նոտարը ճիշտ կամ սխալ է կատարել գործարքը»,- վրդոված պարզաբանեց Գաբոյանը և հավելեց. «Ինչ վերաբերում է էդ Պզե է, Պզո է՝ ես չգիտեմ: Կարդացել եմ այդ մասին լրատվամիջոցներում և այնտեղ շատ հստակ նշված էր, թե ովքեր էին կապված էդ Պզեի հետ, իմ մասին որևէ խոսք նշված չի եղել»:
Հիշեցնենք, որ Պզոյի գործի վերաբերյալ հրապարակումներում շեշտվում էր, որ ԱՄՆ-ի դաշնային հետաքննությունների բյուրոյի ներկայացուցիչները պետք ուսումնասիրություններ կատարեն Հայաստանի նոտարական գրասենյակներում։ Մասնավորապես՝ ԱՄՆ իրավապահներին հետաքրքրում էր հանցավոր խմբի անդամների՝ Հայաստանում ձեռք բերված թանկարժեք բնակարանների, գրասենյակների, առանձնատների նոտարական ձևակերպումների օրինականությունը։
«Նոտարական գրասենյակներում դաշնային բյուրոյի ներկայացուցիչները ի՞նչ պետք է ստուգեն: պետք է ստուգեն՝ արդյոք Պզե կամ Պզո կոչեցյալը եղե՞լ է նոտարական գրասենյակում, գույք առե՞լ է, ի՞նչ գումար է վճարել: Նրանք ուզում էին պարզել, թե այն 163 մլն դոլարը, որ նա յուրացրել է, որտեղ է ներդրել»,- հայտարարեց Գաբոյանը՝ ընդգծելով, որ ԱՄՆ պատկան մարմինները նոտարական մարմիններ ընդհանրապես չեն մտել, և հայտնի չէ՝ Պզոն Հայաստանում ընդհանրապես գույք գնե՞լ է, թե՞ ոչ:
Նոտարիատի նախկին պետը նաև նկատեց, որ դաշնային բյուրոյի ներկայացուցիչները նոտարական գրասենյակներ գնալու կարիք ընդհանրապես չունեն. «Պզոյի» նման հարուստ մարդիկ, եթե 50 մլն դրամն անցնող գույք գնեին, ապա «Ահաբեկչության և փողերի լվացման դեմ պայքարի մասին» օրենքի համաձայն, նոտարը, ինչպես նաև պետռեգիստրը և կադաստրը այդ մասին պարտավոր է հայտնել Կենտրոնական բանկի ֆինանսական դիտարկումների կենտրոնին: Հետևաբար, ԱՄՆ ֆեդերալ բյուրոյի ներկայացուցիչները «ըսկի լայաղ էլ չէին անի» գալ նոտարական գրասենյակներում նման հարցերը ստուգել, քանի որ էդ բաները ստուգվում են ԿԲ-ի նշված բաժնում: Էլ ի՞նչ կապ ունեն այստեղ Գաբոյանը կամ նոտարները: Նոտարն ընդամենը գործարքն է հաստատում, և եթե Պզոն բերում է համապատասխան փաստաթուղթ, գործարք է անում, նոտա՞րը պիտի իմանա՝ նրա ճակատին Պզո՞ է գրված, թե՞ մեկ այլ բան»:
