«Առաջին լրատվական»-ի զրուցակիցն է ԱԺ ՀՀԿ խմբակցության ղեկավար Վահրամ Բաղդասարյանը:
– Պարոն Բաղդասարյան, հունվարի 26-ին ՀՀԿ խորհրդի նիստն է: Ի՞նչ անակնկալներ կարող են լինել:
– Ես չեմ կարծում, որ որևէ արտառոց բան կարող է լինել: Օրակարգը դեռ պատրաստ չէ: Համենայնդեպս, համագումարից հետո սա խորհրդի առաջին նիստն է, մենք խորհրդի կազմը կձևավորենք, նաև կուսակցության նախագահի տեղակալների հարցը կքննարկենք և ընթացիկ հարցեր, նախապատրաստական աշխատանքներ առաջիկա ընտրություններին ընդառաջ:
– Ավագների խորհրդի հետ կապված ի՞նչ նորություն կա: Լինելո՞ւ է, ի վերջո, թե՞ ոչ:
– Բնականաբար, եթե մենք դա ֆիքսել ենք, ուրեմն կլինի նաև ավագների խորհուրդ, որին կանդրադառնանք ընտրություններից հետո:
– Պարոն Բաղդասարյան, ինչո՞ւ անհրաժեշտություն առաջացավ ավագների խորհուրդ ստեղծելու, նեղացա՞ծ էին «տարիքով» հանրապետականները:
– Բազմիցս հարցը քննարկվել է, քանի դեռ ՀՀԿ-ն երիտասարդ կուսակցություն էր, այն ժամանակ նպատակահարմար չէր նման խորհուրդ ունենալու, այն ժամանակ և՛ կանանց խորհուրդ կար, և՛ երիտասարդների խորհուրդ: ՀՀԿ-ն արդեն շուրջ 25 տարեկան քաղաքական ուժ է, այնտեղ բավականին ավանդ ունեցող մարդիկ կան, և ավագների խորհրդի ստեղծման անհրաժեշտություն կա, բայց այդ քննարկումը վերջին 10 տարիներին անընդհատ եղել է:
– Ձեր խորհրդի նիստում ո՞ր հարցերն են լինելու առաջնային:
– Օրակարգը կկազմենք, դուք կծանոթանաք, դեռ օրակարգը պատրաստ չէ:
– Այնուամենայնիվ, ընտրությունների մասո՞վ կլինեն հիմնական դրույթները:
– Կազմակերպչական աշխատանքների:
– Նաև, թե ով կլինի շտաբի պե՞տ:
– Չեմ կարծում, թե խորհրդի նիստում անհրաժեշտություն է այդ մասին խոսելը:
– Պարոն Բաղդասարյան, Հովիկ Աբրահամյանը Հանրապետականից նեղացա՞ծ է, օրինակ՝ ԳՄ նիստում նա դարձյալ ներկա չէր: Ինչո՞վ էր դա պայմանավորված:
– Հովիկ Աբրահամյանը հանրապետությունում չէր, տեղյակ էին խորհուրդը, նախագահը և մենք բոլորս՝ գործադիրի անդամները, որևէ նեղացվածություն չկա Հովիկ Աբրահամյանի մոտ և ընդհանրապես՝ ՀՀԿ-ում: Եթե որևէ մեկը նիստին չի մասնակցում, նեղացածությանն են վերագրում: Չկա նման նեղացածություն:
– Խորհրդի նիստում կքննարկվեն նաև խորհրդի կազմից ոմանց դուրս դնելո՞ւ հարցեր:
– Դեռ խորհրդի կազմը պետք է հաստատենք, դա նշանակում է նաև՝ պարզ կերևա, թե խորհրդի կազմում ովքեր են: Հիմնականում խորհրդի կազմից դուրս կմնան այն մարդիկ, որոնք ինչ-ինչ պատճառներով հանրապետությունում չեն: Այսինքն՝ նման արտառոց բաներ, որ դուք կարող եք սպասել, չկան, ուղղակի մեր կազմը համարյա պահպանված է, կլինեն նաև զարգացումներ, կլինեն նաև մարդիկ, ովքեր այլևս քաղաքական դաշտում չեն և հանրապետությունում չեն՝ աշխատանքի բերումով կամ ուրիշ նպատակներով:
– Այդ թվում նաև Սուրեն Խաչատրյանին խորհրդի կազմից դուրս դնելու հա՞րցը կարող է քննարկվել:
– Չեմ կարծում, Սուրեն Խաչատրյանը մեր խորհրդի անդամ է և, կարծում եմ, կմնա:
– Վերջերս նրա նկատմամբ առավել քան կոշտ է վերաբերվում ՀՀԿ-ն:
– Չէի ասի՝ կոշտ է վերաբերվում, դա բնականոն գործընթաց է, Սյունիքի մարզպետը ՀՀԿ անդամ է, եթե դուք ուշադրություն եք դարձնում, մեզ մոտ ընդհանուր առմամբ տրադիցիա կա, որ եթե մարզպետը ՀՀԿ-ական է, ապա նա է լինում նաև տարածքային կառույցի ղեկավար:
– Պարոն Բաղդասարյան, հնարավո՞ր է, օրինակ, որպես շտաբի պետ Հովիկ Աբրահամյանի անունը քննարկվի՝ հաշվի առնելով նախորդ տարիների փորձը:
– Դեռ չենք քննարկել, բավականին փորձառու է Հովիկ Աբրահամյանը, բայց նման հարցեր դեռ չենք քննարկել:
– Հնարավո՞ր է լինել իշխանության մեջ և լինել ընդդիմադիր: Իշխան Զաքարյանը, ով Վերահսկիչ պալատի նախագահն է, ղեկավարելու է Գագիկ Ծառուկյանի նախընտրական շտաբը: Իշխանությունն այստեղ խնդիր չի՞ տեսնում:
– Դե, բնականաբար, կլինի այնքան պարկեշտություն, որ որոշում կկայացնի երկու դիմումները միաժամանակ ներկայացնելու, եթե նման որոշում կայացնի ձեր նշած անձնավորությունը: Ինքը չի կարող միաժամանակ լինել և՛ իշխանության մեջ, և՛ ընդդիմության: Բայց դեռ պարզ չէ, թե Գագիկ Ծառուկյանի քաղաքական ուժը ինչ հայտով է ներկայանում: Ես չեմ լսել, որ նա հայտարարի, թե ընդդիմություն է, դուք լսե՞լ եք:
– Համենայնդեպս, նրա ելույթից Դուք տպավորություն չստացա՞ք, որ դժգոհ է երկրի այս վիճակից և գալիս է այդ փոփոխություններն իրականացնելու ակնկալիքով: Արտագաղթ, տնտեսության անկում և այլն…
– Մեր ծրագրերը եթե ուսումնասիրեք, մենք էլ ենք գնում փոփոխություններ իրականացնելու և ավելի ճիշտ անիվների վրա դնելու, եթե ունեցել ենք բացթողումներ կամ տեմպերի դանդաղեցում: Մենք նույնպես այդ ծրագրերն ենք իրականացնում, այդ մասին է խոսում ծրագիրը, որ ներկայացրել ենք համագումարում, և կառավարության ծրագիրը:
– Պարոն Բաղդասարյան, արդյոք երեկ ՀՀԿ-ում քննարկվե՞ց Կարեն Կարապետյանի՝ ցուցակում ընդգրկվելու հարցը:
– Ոչ, ընդհանրապես այդ հարցը չի քննարկվել:
– Դա օրակարգային խնդիր չի՞ լինի, եթե հանկարծ որոշվի, որ Կարեն Կարապետյանը չի մասնակցելու:
– Այդ ամեն ինչը թողնում ենք օրենքին: Օրենքը թույլ չի տա՝ չի մասնակցի, բնականաբար, կունենա իր ակտիվ մասնակցությունը՝ առանց ցուցակում լինելու, որպես ՀՀԿ-ական անդամներից մեկը:
– Բայց չէ՞ որ նրա գալով 7000 հոգի մեկ օրում դարձավ ՀՀԿ-ական, մտավախություն չունե՞ք, որ…
– Ոչ, չունենք:
– Բայց կարող են և նրանք ձայն չտալ ՀՀԿ-ին, եթե Կարեն Կարապետյանը ՀՀԿ ցուցակում չլինի:
– Շատ մարդիկ չեն լինելու այդ ցուցակում, բայց նրանք իրենց ամբողջ ներուժը պետք է ներդնեն: Կուսակցության ընտրական ցուցակում լինելը կյանքի նպատակ չէ: Ի՞նչ է նշանակում՝ 300 կամ 250 հոգանոց կուսակցության ցուցակ ենք ունենալու, բայց մնացածը չե՞ն աշխատելու: Տրամաբանական չէ:
– Պարոն Բաղդասարյան, ինչո՞ւ էին այդքան մեղմ հատկապես այն երեք հանրապետական գործիչների գնահատականները, ովքեր ամենակոշտն էին վիրավորել Գագիկ Ծառուկյանին:
– Քաղաքականության մեջ չպետք է լինել հիշաչար, և հետո՝ ներկայանալը, թե ինչ ձևով է ներկայանում. եթե դուք ուշադիր նայեք ձեր նշած քաղաքական գործչի ներկայիս ելույթը և նախկին ելույթը, դրանք էապես տարբերվում են, և երևույթին են տրվել գնահատականները, ոչ թե անձին:
