«Առաջին լրատվական»–ի զրուցակիցն է Հայաստանի Դեմոկրատական կուսակցության նախագահ Արամ Գասպարի Սարգսյանը:
– Պարոն Սարգսյան, արդեն ունե՞ք վերջնական որոշում, թե որ քաղաքական ուժերի հետ կմասնակցեք ընտրություններին:
– Դեռ ոչ, բանակցությունների մեջ ենք, և առաջիկայում այդպիսի հայտարարությամբ հանդես կգանք: Բանակցություններ ընթանում են և՛ Սեյրան Օհանյանի, և՛ Վիկտոր Դալլաքյանի, և՛ մյուս քաղաքական ուժերի, որոնց հետ պետք է վերջնական համաձայնության գանք: Երբ բանակցությունները ավարտվեն, մենք կունենանք համապատասխան փաստաթուղթ:
– Սեյրան Օհանյանի հետ պատկերացնո՞ւմ եք համագործակցություն, գո՞հ եք եղել նրա աշխատանքից:
– Կարող եմ ասել, որ կոնկրետ իր հետ առաջին տարին չէ, որ ծանոթ եմ: Տեղյակ եմ նրա գաղափարներին, մտածելակերպին, քայլերին: Այնպես որ, միանշանակ կարող եմ ասել, որ ես այո, վստահում եմ նրան: Մենք փոխհարաբերությունները ձևավորել ենք և կարող եմ ասել, որ հստակ են դրա հիմքերը: Մնացածը գործողությունները ցույց կտան:
– Այսինքն՝ Ձեր կուսակցությունը համախմբվում է Օսկանյանի և Օհանյանի շուրջ:
– Շուրջ չէի ասի, դա համաձայնություն է, որի հիմքում պետք է լինեն համապատասխան սկզբունքներ, և այդ սկզբունքները մեր կուսակցությունն արդեն որոշակի ձևավորել և ներկայացրել է: Դրանք են՝ առաջինն այն է, որ ովքեր համամիտ են, որ այս երկրում համակարգի իրական փոփոխություն հնարավոր չէ իրականացնել, և պետք է համակարգը քայլ առ քայլ փոխվի: Երկրորդ սկզբունքն այն է, որ մենք այս իրավիճակում պետք է կարողանանք ընդամենը հակաճգնաժամային մի ծրագիր իրականացնենք, որպեսզի, գոնե, հնարավորություն ստեղծվի երկիրը իրական զարգացման դուրս բերելու: Երրորդ՝ Ղարաբաղի հիմնահարցն է, որտեղ պետք է հստակ ձևակերպված լինի բոլոր ուժերի դիրքորոշումը: Չորրորդը տոտալ վերահսկողության հնարավորությունն է, և այստեղ ձևաչափերը կարող են տարբեր լինել, այսինքն՝ ոչ դաշինքային ձևաչափեր: Այն քաղաքական ուժերը, որոնք կուզեն վերահսկողություն իրականացնել ընտրությունների նախօրեին, ընթացքի և նաև արդյունքների հաստատման ժամանակ, նրանք նույնպես կարող են այդ հարցում համագործակցել: Այս չորս սկզբունքները հնարավորություն են տալիս համագործակցելու դաշինքային մակարդակով:
– Ծառուկյանի՝ քաղաքականություն մտնելու դեպքում նույնպե՞ս պատրաստ եք քննարկել և համագործակցել նրա հետ:
– Հիմա մենք ոչ թե գնում ենք գաղափարական հենքի վրա ձևավորման, այլ սկզբունքների: Ցավոք սրտի, մենք հնարավորություն չունենք գաղափարական մրցակցություն ապահովել երկրում, այդտեղ լրիվ այլ իրավիճակ է, և դուք գիտեք, թե ինչպես են ավարտվել նախկին բոլոր ընտրությունները: Դա է պատճառը, որ մենք փորձում ենք այսպիսի ձևաչափով գնալ ընտրությունների:
– Դաշինքները նույնպես երկար կյանք չեն ունեցել:
– Խնդիրն այն է, որ եթե այդ քաղաքական ուժերը համամիտ են համակարգի փոփոխության, ապա կարելի է առաջիկայում նաև այդպիսի որոշումներով և ծրագրերով իրականացնել այդ փոփոխությունները, իսկ հետո, երբ պայմանները բոլորի համար հավասար կլինեն, այն ժամանակ նոր կգնանք գաղափարական պայքարի, կառանձնանանք:
– Արցախի հարցում ունե՞ք տարաձայնություններ Օսկանյանի և Օհանյանի հետ:
– Օհանյանի հետ բացարձակ չունենք տարաձայնություն, երբ «Համախմբում» կուսակցությունը ներկայացնի իր դիրքորոշումը հարցի վերաբերյալ, մենք կքննարկենք: Կարծում եմ՝ չենք ունենա տարաձայնություն:
Լուսանկարը՝ Photolure-ի
