Կատարի ԱԳՆ-ն հանդես է եկել հայտարարությամբ, որում հստակեցրել է, որ Եգիպտոս ուղարկված ամբողջ ֆինանսական օգնությունը նախատեսված է եղել երկրի կառավարությանը, այլ ոչ թե «Մուսուլման եղբայրներ» շարժմանը աջակցելու համար: Այս մասին հայտնում է France Presse գործակալությունը:
«Կապված այն բանի հետ, որ Կատարն աջակցում է «Մուսուլման եղբայրներ» շարժմանը, սխալ տպավորություն է ստեղծվել օգնության մասին, որը Կատարը ցուցաբերում է»,- ասվում է արտգործնախարար Խալիդ Ալ-Աթիյայի հայտարարության մեջ:
«Կատարը երբեք օգնություն չի ցուցաբերել եգիպտական խմբերին կամ քաղաքական կուսակցություններին: Օգնությունը տրամադրվում է ամբողջ Եգիպտոսին»,- հայտնել է նա լրագրողներին ֆրանսիացի գործընկեր Լորան Ֆաբիուսի հետ հանդիպումից հետո:
2013-ի գարնանը Կատարը հանդես էր եկել տնտեսական անկում ապրած Եգիպտոսին 3 միլիարդ դոլարի չափով օգնություն ցուցաբերելու «եղբայրական նախաձեռնությամբ»: Դրամական միջոցները պետք է Եգիպտոսի տնտեսություն մտնեին՝ բանկերում ավանդների ներդրման և ազգային պարտատոմսերի գնման միջոցով:
