ԱՄՆ նախագահ Բարաք Օբաման, որը պաշտոնական այցով գտնվում է Լոնդոնում և հյուրընկալվել է թագուհուն Բուքինգհեմյան պալատում, երեկ իր գործընկեր, Մեծ Բրիտանիայի վարչապետ Դեյվիդ Քեմերոնի հետ այցելել է Academy school դպրոցը, որտեղ սեղանի թենիս է խաղացել: Այս մասին հաղորդում է BBC-ն:
Ըստ հեռուստաալիքի հաղորդած տեղեկությունների՝ Օբամա-Քեմերոն զույգը խաղացել է երկու աշակերտի դեմ: Նրանց հաջողվել է մի քանի անգամ հետ մղել վտանգավոր հարվածները, իսկ Քեմերոնն ընդհանրապես լավ խաղ է ցուցադրել:
Հիշեցնենք նաև, որ երեկ ընդունելություն է կազմակերպվել ի պատիվ ԱՄՆ նախագահի: Ողջույնի խոսքով են հանդես եկել Բարաք Օբաման և Մեծ Բրիտանիայի թագուհի Ելիզավետա 2-րդը, ապա կենացներ են ասել: Բացի այդ, Օբաման և Քեմերոնը հանդես են եկել համատեղ հոդվածով, որը տպագրվել է The Times թերթում: Երկրների ղեկավարներն անդրադարձել են աշխարհում տիրող իրավիճակին՝ իրենց աջակցությունը հայտնելով ժողովրդավարության համար պայքարող մարդկանց:
Օբաման Եվրոպայում է գտնվում արդեն մայիսի 23-ից: Նա հասցրել է այցելել նաև Իռլանդիա: Մեծ Բրիտանիայից հետո նա պատրաստվում է ֆրանսիական Դովիլ քաղաքում ներկա գտնվել «Մեծ ութնյակի» գագաթնաժողովին, ինչպես նաև այցելել Լեհաստան, ուր պետք է քննարկի հակահրթիռային համակարգ տեղադրելու հարցը:
