Թուրքական Son dakika լրատվական կայքի փոխանցմամբ՝ Թուրքիայի նախագահ Ռեջեփ Էրդողանը, ելույթ ունենալով Շանլըուրֆա (Ուրֆա) քաղաքում, հայտարարել է, որ սիրիացի ու իրաքցի փախստականների մի մասը կստանա Թուրքիայի քաղաքացիություն։
Էրդողանն ընդգծել է, որ Թուրքիայի ՆԳՆ-ն արդեն իսկ աշխատում է տվյալ ուղղությամբ։ Նա գովաբանել է քաղաքի բնակիչներին վերջին 6 տարում սիրիացի փախստականներին ընդունելու համար։
Թուրքիայի նախագահը հայտարարել է, որ Արևմուտքում, որտեղ կենսամակարդակը շատ ավելի բարձր է, փախստականների հարցում աչքի չեն ընկել նման գործունեությամբ.
«Մենք փախստականների վրա ծախսել ենք 20 միլիարդ դոլար և միջազգային հանրությունից ստացել ենք միայն 677 միլիոն եվրո։ Նրանք Թուրքիային խոստացել էին 3 միլիարդ եվրո։
Այս տարի պետք է հատկացնեն ևս 3 միլիարդ եվրո։ Սակայն այդ գումարները չեն հասնում մեզ։ Հետաքրքիր է, թե ինչու»։
