«Ընդդեմ իրավական կամայականության» ՀԿ նախագահ Լարիսա Ալավերդյանն այսօր լրագրողների հետ հանդիպմանն անդրադարձավ ՌԴ նախագահ Վլադիմիր Պուտինի՝ Ադրբեջան կատարած այցին: Նա նշեց, որ այդ այցի մեջ որևէ արտասովոր բան չկա, քանի որ Ռուսաստանը ունի իր քաղաքական շահերը, և Հայաստանը որոշումներ կայացնելու համար գործոն չի եղել երբևէ. «Ես չեմ կարծում, որ այդ հանդիպումը երկարատև հարաբերությունների սկիզբ է, դա միայն առաջին քայլն է, և Ռուսաստանի համար շնից մազ պոկելու խնդիր կա»:
Նա հավաստեց, որ այս հանդիպումը ողբերգական ընդունելու պատճառ չունենք, քանի որ և՛ Հայաստանը, և՛ Ադրբեջանը, և՛ Ռուսաստանը անկախ պետություններ են և ունեն իրենց շահերը: Նրա մեկնաբանությամբ՝ Պուտինը մեկ հարցով չէր գնա Ադրբեջան, անշուշտ քննարկվել են մի շարք խնդիրներ:
Բանախոսի հավաստմամբ՝ մեր իշխանությունների վատն այն է, որ միշտ այս կամ այն դեպքի շուրջ արձագանքում են, ոչ թե հանդես գալիս նախաձեռնողականությամբ:
Ինչ վերաբերում է ադրբեջանական կողմին գերի ընկած հայ զինծառայող Հակոբ Ինջիղուլյանին, ապա տիկին Ալավերդյանն ասաց, որ այս հարցում Ադրբեջանն իրեն սխալ պահեց, չնայած դրական պետք է համարել այն, որ գոնե հայտարարեց, որ մեր տղան մոլորվել է. «Կոչ եմ անում Ադրբեջանին բանակցել Կարմիր Խաչի հետ և հարազատ մնալ իր ընդունած պարտավորություններին, որոնք կոնվենցիայով ամրագրված են»:
Լուսանկարը՝ PanARMENIAN Photo-ի
