Շաբաթ օրը հայտնի դարձավ, որ Եվրոպայի լիբերալ-դեմոկրատական կուսակցությունը Դրեզդենում կայացած խորհրդի նիստում ընդունել է մի բանաձև, որը վերաբերում է Հայաստանի ներքաղաքական զարգացումներին, Մարտի 1-ի հետևանքների վերացմանը և հայ պաշտոնյաների նկատմամբ հնարավոր պատժամիջոցներին:
Խորհուրդը կոչ էր արել Հայաստանի իշխանություններին` առանց նախապայմանների և անմիջապես ազատ արձակել քաղաքական բանտարկյալներին, Եվրոպայի ազատականների և ժողովրդավարների ալյանսին կոչ էր արել արդարադատության համակարգը քաղաքական նպատակներով օգտագործող հայ պաշտոնյաների համար բարձրացնել ԵՄ մուտքի արտոնագրերի տրամադրման արգելքի հարցը, այդ խնդիրը հիմնական դարձնել ԵՄ-Հայաստան երկխոսության շրջանակներում: Եվրոպայի լիբերալ-դեմոկրատական կուսակցությունն անդամ կուսակցությունների պատվիրակներին կոչ էր արել նաև այս խնդրին առաջնություն տալ իրենց երկրների խորհրդարանների և Հայաստանի խորհրդարանի հետ համագործակցության ժամանակ: Բանաձևի տեքստն առաջարկել էր Հայոց համազգային շարժում կուսակցությունը, այն ընդունվել էր 57 լիբերալ կուսակցությունների 100-ից ավելի պատվիրակների կողմից:
Եվրոպայի լիբերալ-դեմոկրատական կուսակցության խորհրդի նիստում ընդունված վերոնշյալ բանաձևը բավական ուշագրավ և աննախադեպ որոշում է, և թերևս Հայաստանի իշխանությունները չեն գիտակցում այդ բանաձևի հնարավոր հետևանքների ողջ լրջությունը:
Հիշեցնենք, որ 2010թ. մարտի 12-ին Հռոմում տեղի ունեցած Եվրոպայի լիբերալ-դեմոկրատական և բարեփոխումների կուսակցության` ԵԼԴԲԿ-ի խորհրդի նիստում ՀՀՇ-ն դարձավ այդ կազմակերպության անդամ, իսկ Եվրոպայի լիբերալ-դեմոկրատական և բարեփոխումների կուսակցությունը մեծ տրադիցիաների հետևորդ է թե՛ Եվրախորհրդարանում, թե՛ ԵԽԽՎ-ում£ ԵԼԴԲԿ-ն ձգտում է ազատության սկզբունքները ներդնել քաղաքականության, տնտեսության և հասարակության մյուս ոլորտներում: ԵԼԴԲԿ-ն կազմված է 58 անդամ կուսակցություններից: Լիբերալ-դեմոկրատներն իրենց եվրոպական քաղաքական ընտանիքը ստեղծել են 1976թ., 1993թ. ԵԼԴԲԿ-ն հաստատվեց որպես իսկապես վերազգային կուսակցություն: ԵԼԴԿ-ի նախագահն է Էննեմի Նեյթս-Յութթերբրոքը: ԵԼԴԲԿ-ի անդամ 72 պատգամավորներ այսօր Եվրոպական խորհրդարանում են ներկայացված: Եվրոպական դեմոկրատական կուսակցության հետ միասին այն Եվրախորհրդարանում 3-րդ քաղաքական ուժն է, 84 լիբերալների և դեմոկրատների ալյանսով։
Դեռ անցյալ տարի օգոստոսին ԵԼԴԿ-ն կոչ էր արել Հայաստանի իշխանություններին` «անհապաղ ազատ արձակել բոլոր քաղբանտարկյալներին»։ Կուսակցության նախագահ Էննեմի Նեյթս-Յութթերբրոքի հայտարարության մեջ ասվում էր. ՙՀայաստանը, լինելով ԵԽ անդամ երկիր, պետք է անհապաղ ազատ արձակի բոլոր քաղբանտարկյալներին, քանի որ խոսքի ազատությունը և համոզմունքների ազատությունը ԵԽ հիմնարար արժեքներից են: Քաղաքական դրդապատճառներով մարդկանց բանտում պահելը և նրանց արդար դատաքննության իրավունքից զրկելը հակասում է ԵԽ անդամ երկրների հիմնարար պարտականություններին և անկասկած կարող է խոչընդոտել Հայաստանի և ԵՄ մերձեցման գործընթացը»:
Եվրոպայի լիբերալ-դեմոկրատական կուսակցության խորհրդի նիստում ընդունված բանաձևի առիթով «Առաջին լրատվական»-ը զրուցեց Եվրոպայի լիբերալ-դեմոկրատական կուսակցության փոխնախագահ, այժմ` Գերմանիայի կառավարության մարդու իրավունքների հանձնակատար Մարկուս Լյոնինգի հետ: Պարոն Լյոնինգին նախ հարցրեցինք, թե բանաձևը ի՞նչ ազդեցություն կարող է ունենալ և ո՞րը պետք է լինի հաջորդ քայլը: «Ես հույս ունեմ, որ Հայաստանի իշխանությունները անհապաղ ազատ կարձակեն բոլոր քաղբանտարկյալներին: Ճիշտ է, մինչ այժմ որոշ քաղբանտարկյալներ ազատ են արձակվել, սակայն լավ կլինի, որ բոլորն ազատ արձակվեն, և ապահովվեն ՀՀ քաղաքացիների խոսքի ազատությունը և մարդու իրավունքներն ու ազատությունները»: Իսկ եթե ՀՀ իշխանությունները ազատ չարձակեն, որո՞նք կլինեն ձեր հաջորդ քայլերը` հարցրեցինք Գերմանիայի մարդու իրավունքների հանձնակատարին: «Հաջորդ քայլը հենց քաղբանտարկյալների ազատ արձակումն է և խոսքի ազատության ապահովումը: Հայաստանը, դառնալով ԵԽ անդամ, միանալով միջազգային այլ կոնվենցիաների, պարտավորություններ է ստանձնել, ուստի պետք է ապահովի, հարգի և պաշտպանի իր քաղաքացիների իրավունքները: Եվ սա է այն հաջորդ քայլը, որը մենք ակնկալում ենք Հայաստանի իշխանություններից», շեշտեց գերմանացի պաշտոնյան:
Արդեն երեք տարի է` մենք և եվրոպական կառույցները կրկնում ենք, բայց որևէ քայլ չկա դեպի ժողովրդավարություն և մարդու իրավունքների պաշտպանություն, դուք զուգահեռներ տեսնո՞ւմ եք Բելառուսի և Հայաստանի միջև, քանի որ ԵՄ-ն բավական կոշտ գտնվեց Լուկաշենկոյի հանդեպ, նույնը կարո՞ղ է դրսևորվել Հայաստանի իշխանությունների նկատմամբ` հարցրեցինք պարոն Լյոնինգին: «Յուրաքանչյուր կառավարություն պետք է զգոն լինի, որովհետև ԵՄ-ն բավական ուշադիր հետևում է, թե ինչ է կատարվում` արդյո՞ք կառավարությունները հարգում են իրենց քաղաքացիների իրավունքները: Մենք զգում ենք, որ Հայաստանի իշխանությունները գիտակցում են, որ ԵՄ-ն հետևողական է այս հարցերում: Յուրաքանչյուր կառավարություն պետք է հասկանա, որ եթե չկատարի ստանձնած պարտավորությունները` դա կարող է հետևանքների հանգեցնել», պատասխանեց Մ.Լյոնինգը:
Գերմանիայի մարդու իրավունքների հանձնակատարին հարցրեցինք նաև, թե այնուամենայնիվ Հայաստանի պաշտոնյաների նկատմամբ պատժամիջոցներ կարո՞ղ են կիրառվել: «Ես հիմա չեմ խոսի պատժամիջոցների մասին, ես խոսում եմ Հայաստանի ստանձնած պարտավորությունների մասին: Ես կոչ եմ անում ՀՀ իշխանություններին հետևել ստանձնած պարտավորություններին, քանի որ հակառակ դեպքում հետևանքները կարող են շատ ծանր լինել», նկատեց Մ.Լյոնինգը:
