Վրացական News Georgia կայքի փոխանցմամբ, Վրաստանի փոխվարչապետ, եվրոպական ու եվրատլանտյան կառույցներին ինտեգրման գծով պետնախարար Գեորգի Բարամիձեն, մեկնաբանելով վրացական ընդդիմության ակցիաներն ու դրանց հանդեպ պաշտոնական Մոսկվայի դիրքորոշումը, սուր քննադատության է ենթարկել Ռուսաստանին.
«20 տարուց ավելի է, ինչ Ռուսաստանը խանգարում է Վրաստանի եվրոպական զարգացմանը: Ռուսաստանը շարունակում է ռազմական, տնտեսական ու քաղաքական քարոզչության միջոցով Վրաստանում աջակցել տարբեր ուժերի:
Որոշ վրացական քաղաքական գործիչներ հայտարարում են, թե մի քանի օրում իշխանափոխություն կիրականացնեն Վրաստանում: Սակայն նրանք հանրաճանաչություն ու վարկանիշ չունենալով երկրում՝ ուղևորվում են Կրեմլ:
Նրանք այն քաղաքական գործիչներն են, ովքեր ոչ մի հնարավորություն չունեն ընտրություններում հաղթելու համար: Ռուսաստանն էլ խրախուսում է նրանց՝ խոսելու բռնության ու միֆական երևույթների մասին, ինչը նրանց, իբրև թե, հնարավորություն կընձեռի նոր պաշտոններ ստանալ: Այդ քաղաքական գործիչները նախկինում ունեցել են ամեն ինչ, սակայն չեն կատարել իրենց պարտականությունները: Նրանց ագահությունը նորից ի հայտ է եկել, և այսօր նրանք սկսել են արտահայտել Ռուսաստանի շահերը»:
Հիշեցնենք, որ դեռևս ապրիլի սկզբին Բարամիձեն հայտարարել էր. «Մենք բավականաչափ հիմքեր ունենք կարծելու, որ Ռուսաստանը դեռևս պահպանում է Վրաստանի վերաբերյալ իր ագրեսիվ պլանները: Վրաստանում գոյություն ունեն ընդդիմադիր ուժեր, որոնք մտադիր են անկարգություններ ու բախումներ կազմակերպել՝ այն հույսով, որ վերջին պահին Ռուսաստանը կմիջամտի գործին և նրա զորքերի օգնությամբ կարելի կլինի տապալել վրացական գործող իշխանությունները»: