Gazeta.ru կայքի փոխանցմամբ, լրատվական գործակալությունները հաղորդում են վիրահատության ենթարկված Աբխազիայի նախագահ Սերգեյ Բաղափշի առողջական վիճակի բարելավման մասին, սակայն Life News պարբերականը Բաղափշի առողջական վիճակը որակել է որպես վտանգավոր:
Интерфакс-ը գրում է, որ շաբաթ օրն աջ թոքի վիրահատությունից հետո Բաղափշի վիճակը կայուն է, և բժիշկները գոհ են հետվիրահատական վերականգնողական գործընթացից:
РИА Новости-ն գրում է, որ կրծքավանդակի վիրահատությունը հաջող է անցել:
Իսկ Life News պարբերականը գրում է, որ մայիսի 23-ի գիշերը Բաղափշի առողջական վիճակը վիրահատությունից հետո կտրուկ վատացել է, բժիշկները խուսափում են այդ կապակցությամբ կանխատեսումներ անել, առաջիկա երեք օրերը վճռորոշ կլինեն:
Հիշեցնենք, որ Սերգեյ Բաղափշն Աբխազիայի նախագահ է դարձել 2005 թվականի փետրվարի 12-ին:
