Չբավարարվելով ՀՀԿ Սյունիքի մարզային կառույցի կայացրած որոշմամբ՝ երեկ անձամբ Սերժ Սարգսյանը կուսակցության գործադիր մարմնի նիստի ժամանակ որոշել է Կապանի նախկին քաղաքապետ Արմեն Կարապետյանին առաջադրել որպես պատգամավորի թեկնածու: Վերջինս սեպտեմբերի 29-ին կայանալիք թիվ 38 ընտրատարածքի ԱԺ լրացուցիչ ընտրություններում կներկայացնի ՀՀԿ-ին ու, թերևս, կմրցակցի ինքն իր հետ:
Այս մասին այսօրվա համարում գրում է «Ժողովուրդ» օրաթերթն ու հավելում, որ բանն այն է, որ հայրենի քաղաքական դաշտում եղած կուսակցություններից որևէ մեկը մտադիր չէ մասնակցել այդ ընտրություններին: ԱԺ ՀՅԴ խմբակցության քարտուղար Աղվան Վարդանյանը «Ժողովուրդ»-ին տեղեկացրել է, որ իրենք որոշակի քննարկումներից հետո ի վերջո որոշել են չմասնակցել ընտրություններին: ԲՀԿ մամլո խոսնակ Տիգրան Ուրիխանյանն ասել է, թե տեղեկություն չունի՝ կմասնակցի ԲՀԿ-ն, թե՛ ոչ:
«Ժառանգություն»-ն էլ կորոշի այսօր: Իսկ ՀԱԿ-ը վաղուց է հայտարարել, որ «ձեռքերը լվանում» է: Թերևս կարելի է կանխատեսել, որ նշված օրը ՀՀԿ-ն պատգամավոր «կնշանակի» Կապանում պարտված քաղաքապետի թեկնածուին:
Հոդվածն ամբողջությամբ՝ կարդացեք «Ժողովուրդ» -ի այսօրվա համարում:
