Բավականին կտրուկ է արձագանքել Ֆեյսբուք սոցիալական ցանցի հայաստանյան համայնքը Նարեկ Սարգսյանին Երևանի գլխավոր ճարտարապետ նշանակելու մասին Կարեն Կարապետյանի մայիսի 23-ի որոշմանը: Եթե երեկ ողջ օրը մարդիկ տարածում էին այդ տեղեկատվությունը՝ լավագույն դեպքում տարակուսանք, ավելի հաճախ՝ զայրույթ արտահայտելով դրա կապակցությամբ, ապա այսօր մի խումբ ֆեյսբուքցիներ արդեն գործի են անցել:
Մասնավորապես, Նարեկ Սարգսյանի հրաժարականի պահանջով ստորագրահավաք է սկսվել հենց Կարեն Կարապետյանի անձնական էջում: Արդեն իսկ մի քանի տասնյակ մարդ միացել է հեռանալու պահանջին: Բացի այդ, քաղաքացիները հիշեցնում են պարոն Սարգսյանի պաշտոնավարման տարիներին քաղաքին հասցված վնասի կոնկրետ դեպքեր:
Հնչում են անգամ այսպիսի կարծիքներ. «Եթե Հյուսիսային պողոտայի կառուցապատման մշակույթի կրողն էինք, հենց սկզբից էլ ասեիք, էլ ինչ «զզվում եմ վերնիսաժի առևտրից, փողոցային առևտրից, Պանթեոնի փնթիությունից»: Հիմա զզվելու ավելի շատ բան կունենաք, քանի որ Սարգսյան Նարեկի գործերն եք ստիպված լինելու ամեն օր ստորագրել…»:
Այս ամենին շատ արագ հետևել է Կարեն Կարապետյանի պատասխանը՝ առանձին «նոթի» տեսքով, որում քաղաքապետը փորձում է հիմնավորել Սարգսյանի նշանակումը: Նա, մասնավորապես, նշել է հետևյալը. «Նարեկ Սարգսյանը սիրում է Երևանը ոչ պակաս, քան մեզանից յուրաքանչյուրը, և կարծում եմ մենք բոլորս պետք է իրեն քաջալերենք և բարենպաստ դաշտ ստեղծենք, որպեսզի նա հնարավորություն ունենա իր սերը քաղաքի նկատմամբ դրսևորել»։ Սրան ի պատասխան՝ քաղաքացիներից մեկը գրել է. «Պարոն Կարապետյան, նա իր սերը քաղաքի նկատմամբ ժամանակին դրսևորել է, պարզապես այդ սերը վերաճել է նրա ու քաղաքի միջև սեռական հարաբերության, որտեղ տղամարդու դերում Նարեկ Սարգսյանն է եղել: Էդ պատուհասի նշանակումը հիմնավորելու բոլոր փորձերը, կարծում եմ, հիմնովին դատապարտված են: Ավելին ասեմ, իզուր էլ ձեզ վրա վերցրիք էդ պատասխանատվությունը: Գոնե մինչ այս կարող էին ասել, որ նախագահի կամ վարչապետի կողմից պարտադրված որոշում է»:
Մեկ այլ մեկնաբանությամբ, հղում կատարելով Կարեն Կարապետյանի նոթում Նարեկ Սարգսյանին տրված գնահատականում բացասական բառը չակերտներում գրելուն, ասվում է. «Էս բացասականն ինչո՞ւ եք չակերտների մեջ դրել: Համամիտ չե՞ք, որ դրել քաղաքի հերն անիծել ա: Այսինքն «он больше так не будет» լոգիկայո՞վ շարժվենք: Չհասկացա, Հայաստանում ճարտարապետների սո՞վ ա, ստիպված պիտի հարմարվե՞նք: Չենք հարմարվի: Հըլը թող փորձի Երևանին վնաս տա…»։
