Պորտուգալիայի նախկին վարչապետ Անտոնիու Գուտերիշը երդմնակալել է ՄԱԿ-ի 9-րդ գլխավոր քարտուղարի պաշտոնում։ Նրա 5-ամյա ժամկետը պաշտոնապես կսկսվի հունվարի 1-ից՝ հայտնում է BBC-ն։
Գլխավոր ասամբլեայի առջև իր ելույթում Գուտերիշը նշել է, որ կազմակերպությունը տասնամյակների ընթացքում նպաստել է Երկրի վրա խաղաղության պահպանմանը, սակայն հիմա դժվարությամբ է հաղթահարում այդ հանձնարարությունը։
«ՄԱԿ-ը պետք է պատրաստ լինի փոփոխությունների։ Մեր ամենալուրջ թերությունը, և այստեղ ես նկատի ունեմ ողջ միջազգային հանրությունը, ճգնաժամերը կանխել չկարողանալն է։ ՄԱԿ-ը ծնվել է պատերազմի ընթացքում, այսօր մենք պետք է այստեղ լինենք խաղաղության համար»,-ասել է նա։
Արարողության ժամանակ նա երդում է տվել ծառայել կազմակերպության, այլ ոչ թե առանձին երկրների շահերին։ Նրա խոսքով՝ համաշխարհային կազմակերպությունը պետք է կենտրոնանա ժողովուրդների միջև խաղաղության աջակցման, կայուն զարգացման, ինչպես նաև ներքին բարեփոխումների անցկացման վրա։
Հոկտեմբերին նոր գլխավոր քարտուղարը հայտարարել էր, որ իր առաջնահերթությունն այդ պաշտոնում կդառնա Սիրիայում ռազմական հակամարտության ավարտը։
67-ամյա Գուտերիշը ՄԱԿ-ի գլխավոր քարտուղարի պաշտոնում կփոխարինի 72-ամյա Պան Գի Մունին, ով գլխավորում է կազմակերպությունը 2007 թվականի հունվարից։
Անտոնիու Գուտերիշը եղել է Պորտուգալիայի վարչապետը 1995-2002 թթ։ 2005 թվականին նա նշանակվել է փախստականների հարցերով ՄԱԿ-ի գերագույն հանձնակատարի պաշտոնում և զբաղեցրել այն մինչև 2015 թվականը։
