«Դիսկուրս»- ի շրջանակներում հերթական անգամ անդրադարձ կատարվեց ՀՀ արտաքին քաղաքականության հիմնախնդիրներին:
Մենք ինչպիսի՞ արժեքային համակարգ ենք ընտրում, ինչո՞ւ ենք գնում տարբեր բանաձևերի՝ արևմտյան, ռուսական, հայաստանակենտրոն: Ի՞նչ ենք մենք հասկանում՝ ազգային արժեքներ ասելով, ինչը մենք հաճախ հակադրում ենք արևմտյան արժեքներին, ի՞նչն է մեզ պակասում… Այս և այլ հարցերի շուրջ «Առաջին լրատվական»- ի հետ զրույցում իրենց դիտարկումները ներկայացրին սոցիոլոգ Միքայել Զոլյանը և ՀՀԿ խմբակցության պատգամավոր Լևոն Մարտիրոսյանը:
Լևոն Մարտիրոսյանի կարծիքով՝ Հայաստանը պետք է դավանի եվրոպական արժեքներ՝ անկախ նրանից, թե ինչ քաղաքական կամ ինչ ռազմաքաղաքական դաշինքներում է գտնվում. «Եվրոպական արժեքները համամարդկային են և առավել հարիր են մեր ազգին: Կարծում եմ, որ ԵՄ-ի հետ հարաբերություններ չունենալու դեպքում էլ պարտադիր պետք է ամեն ինչ անենք, որպեսզի համապատասխանենք ԵՄ անդամ կամ թեկնածու երկրներին առաջադրվող պահանջներին»:
Միքայել Զոլյանի դիտարկմամբ՝ Հայաստանում չկա միասնական դիրքորոշում, թե որ արժեհամակարգի կրողն ենք մենք, ամբողջ հասարակությունը չէ, որ եվրոպական արժեքների կրողն է. «Մեզ մոտ չկա հստակ ընբռնում, թե ինչ է նշանակում եվրոպական արժեքներ, տարածված կարծրատիպեր կան, որոնք խանգարում են: Իրականում եվրոպական արժեքները հենց այն են, ինչին հայությունը դարեր շարունակ ձգտել և ինչը անվանում ենք ազգային ազատագրական պայքար. ազատագրված Հայաստանը միշտ պատկերացրել են որպես ժողովրդավարական պետություն»:
Մենք մեր դեմ գնալով՝ չստորագրեցինք Ասոցացման պայմանագիրը, 2013-ի սեպտեմբերի 3-ի մեր որոշմամբ՝ հրաժարվեցինք այդ դաշինքի մեջ մտնելու հնարավորությունից՝ նախընտրելով ԵՏՄ անդամակցությունը: Այս դիտարկման վերաբերյալ Միքայել Զոլյանը նշեց, որ դա զուտ աշխարհաքաղաքական խնդիր է, և նաև, բացի դրանից, խնդիրն այն է, որ մեր իշխանական վերնախավի մեծ մասը պատրաստ չէ եվրոպական խաղի կանոններին:
Մանրամասները՝ տեսանյութում:
