Արդյոք Օբամայի վարչակազմը Առաջին աշխարհամարտի տարիներին հայերի զանգվածային կոտորածը քողարկված կերպով ճանաչե՞լ է որպես Ցեղասպանություն՝ գրում է Associated Press պարբերականը:
«Ցեղասպանություն» եզրույթը տաբու է եղել ԱՄՆ բարձրաստիճան պաշտոնյաների, այդ թվում՝ Բարաք Օբամայի համար, ով խոսել է զանգվածային կոտորածների և պատմական ողբերգության մասին։ Բայց Օբամայի օրոք ՄԱԿ–ում ԱՄՆ դեսպան Սամանտա Փաուերը կոտրել է այդ լռությունը։
Վաշինգտոնում Նոբելյան մրցանակի դափնեկիր Էլի Վիզելի հիշատակին նվիրված միջոցառման ժամանակ, որը փրկվել է Հոլոքոստից, Փաուերը հիշատակել է Հայոց ցեղասպանության ժխտման մասին (Genocide denial against the Armenians)։
«Այս 5 բառը կարող է առաջ բերել Թուրքիայի զայրույթը, որը կտրականապես դեմ է ցեղասպանության վերաբերյալ ցանկացած հիշատակման, և որի ռազմավարական դերը՝ որպես ՆԱՏՕ-ի և ԱՄՆ-ի դաշնակից, ամերիկացի բարձրաստիճան պաշտոնյաներին ստիպում է շատ զգուշորեն խոսել մեկ դար առաջ տեղի ունեցած կոտորածի մասին։ Նման հայտարարությունն անակնկալ է՝ հաշվի առնելով Փաուերի կարգավիճակը, որը դասով երկրի երկրորդ դիվանագետն է, և նրա բառերը քողարկված քննադատություն են՝ ուղղված Օբամային»՝ ասվում է հոդվածում։
Օբաման իր նախընտրական քարոզարշավների ժամանակ բազմիցս խոստացել էր ճանաչել Հայոց ցեղասպանությունը, բայց նման բան չարեց։
Նախքան պաշտոնը ստանձնելը՝ Փաուերը, որը Պուլիտցերյան մրցանակի արժանացած լրագրող է, շատ է գրել Ցեղասպանության նկատմամբ ԱՄՆ արձագանքի մասին։ Պաշտոնյաների խոսքերով՝ նա հետնաբեմում բազմիցս կոչ է արել ճանաչել Հայոց ցեղասպանությունը։
Փաուերի մամլո խոսնակ Կուրտիս Կուպերը հայտարարել է, որ Ցեղասպանության հիշատակումը հնչել է Վիզելի հիշատակի ֆոնին և նպատակ է ունեցել «կոչ անել մյուսներին դեմ հանդես գալ, այլ ոչ թե պաշտպանել պարբերաբար տեղի ունեցող անարդարությունը, զանգվածային գազանություններն ու ցեղասպանությունները, որոնցից մեկը նա ստիպված էր հանդուրժել»։ Նա նշել է, որ Փաուերի բառերը չեն արտահայտում վարչակազմի քաղաքականության փոփոխությունը։
ԱՄՆ պետդեպարտամենտի խոսնակ Մարկ Թոները հայտարարել է, որ ԱՄՆ քաղաքականության մեջ ոչ մի փոփոխություն տեղի չի ունեցել։
«Նախագահը և վարչակազմի բարձրաստիճան այլ պաշտոնյաներ բազմիցս սգացել են և ընդունել Օսմանյան կայսրությունում 1.5 մլն հայերի սպանության և բռնի տեղահանման փաստը, ինչպես նաև հայտարարել են, որ փաստերի լիարժեք, անկեղծ ու բացահայտ ճանաչումը մեր շահերից է բխում»,- ասել էր Թոները։
Այն հանգամանքը, որ Օբաման հայերի զանգվածային կոտորածը չբնութագրեց որպես Ցեղասպանություն, հարուցել է իրավապաշտպանների և փաստաբանների զայրույթը՝ ասվում է հոդվածում։
