Այսօր կառավարությունում հյուրընկալվել էր Չիլիի մասնավոր կենսաթոշակային համակարգի հիմնադիր Խոսե Պինիերան, ով Հայաստան է ժամանել ՀՀ վարչապետ Տիգրան Սարգսյանի հրավերով: Այս մասին ասվում է Կառավարության տարածած մամլո հաղորդագրությունում։
«Չիլիի կենսաթոշակային ռեֆորմի ճարտարապետներից մեկը` Խոսե Պինիերան, Հայաստանում է և կարող է մեզ հետ կիսվել այն փորձով, որ առկա է Չիլիում, կենսաթոշակային ռեֆորմի հիմնական գաղափարներով: Բնականաբար, նա անդրադառնալու է առաջին հերթին այն հարցերին, որոնք այսօր մտահոգում են նաև ՀՀ հանրությանը` կենսաթոշակային ռեֆորմի տրամաբանությունը, հավաքագրված միջոցների հուսալիությունը, դրանց եկամտաբերության ապահովման խնդիրները, որպեսզի քաղաքացիները երկարաժամկետ առումով վստահ լինեն, որ իրենց կուտակած փողերը չեն փոշիանա: Այսօր Չիլիի փորձը մեզ հնարավորություն է տալիս ավելի լավ հասկանալ, թե ինչ բարդությունների և դժվարությունների են հանդիպում այն մարդիկ, ովքեր այս ռեֆորմն իրականացնում են, և Չիլիի փորձից ելնելով` հասկանանք` որոնք են այդ դժվարությունները հաղթահարելու լավագույն ուղիները»,- ասել է վարչապետ Տիգրան Սարգսյանը:
Շնորհակալություն հայտնելով հրավերի համար` Խոսե Պինիերան նշել է, որ թեպետ առաջին անգամ է Հայաստանում, բայց մշտապես հետաքրքրվել է Հայաստանի պատմությամբ: Նա հայտնել է, որ 2011թ. մայիսի 1-ին Չիլիում նշվել է կենսաթոշակային բարեփոխումների 30-ամյակը` խորհրդանշական համարելով այդ իրադարձությունն աշխատավորի օրը տոնելը: Ընդգծելով, որ կենսաթոշակային բարեփոխումն ազդում է մյուս բոլոր բարեփոխումների վրա` Խոսե Պինիերան մանրամասներ է ներկայացրել 30 տարի առաջ Չիլիում մեկնարկած կենսաթոշակային բարեփոխումների, դրանց իրականացման ընթացքի և կուտակային համակարգին անցման առանձնահատկությունների վերաբերյալ:
Ի դեպ, հանդիպման մասնակիցների թվում էր նաև Վրաստանի աշխատանքի, առողջապահության և սոցիալական հարցերի նախարարը` իր տեղակալի հետ: Նշենք, որ Հայաստանում արդեն տրվել է կենսաթոշակային բարեփոխումների մեկնարկը: 2011 թ. հունվարի 1-ից գործում է կամավոր կուտակային կենսաթոշակային համակարգը, որին կամավորության սկզբունքով կարող է միանալ յուրաքանչյուր քաղաքացի: 2014 թ. հունվարի 1-ից ուժի մեջ կմտնի պարտադիրության սկզբունքով գործող կուտակային կենսաթոշակային համակարգը, որի մեջ կընդգրկվեն 1974 թ. հունվարի 1-ից հետո ծնված բոլոր քաղաքացիները:
