Գերմանիան ԱՄՆ կողմից լրտեսության գլխավոր նպատակակետերից մեկն է: Այս մասին հաղորդում է Der Spiegel ամսագիրը՝ վկայակոչելով ԿՀՎ նախկին աշխատակից Էդվարդ Սնոուդենի տրամադրած փաստաթղթերը:
ԱՄՆ հատուկ ծառայություններին առաջին հերթին հետաքրքրում է ԳԴՀ արտաքին քաղաքականությունը և տնտեսական վիճակը: 2013թ. ապրիլին թվագրված փաստաթղթում նշված են երկրները, որոնք առաջնային են Ազգային անվտանգության գործակալության կողմից լրտեսվելու առումով:
Հետաքրքրության մակարդակը և ձեռք բերված տեղեկության կարևորությունը գնահատված են 5 բալանի սանդղակով: Համար մեկը նշանակում է «առավելագույնս հետաքրքիր», հինգերորդը՝ «նվազագույն»: Գերմանիան ցուցակի մեջտեղում է՝ Ֆրանսիայի և Ճապոնիայի հետ նույն մակարդակում:
ԳԴՀ արտաքին քաղաքականությունը և տնտեսությունը ցուցակում երրորդն է: Ամենաքիչը ուշադրություն է դարձվում զենքի արտահանմանը, նոր տեխնոլոգիաների զարգացմանը և միջազգային առևտրին. այս թեմաները համար 4-ի ներքո են գտնվում:
