Պերուի մայրաքաղաք Լիմայի փողոցներից մեկում տեղի է ունեցել բարձրակրունկ կոշիկներով մրցավազք, հայտնում է Associated Press գործակալությունը: Մասնակից կանայք պետք է վազեին 150 մետր:
Մրցույթին մասնակցելու համար աղջիկները պետք է ներկայանային կոշիկներով, որոնց կրունկներն ունեն 5 սմ և ավելի բարձրություն: Բացի այդ, մասնակցության գրանցման համար անհրաժեշտ էր մուծել նաև որոշակի գումար: Վազքը բարեգործական նպատակ ուներ, ստացված գումարները տրվել են այն կանանց և երեխաների օգնության կազմակերպություններին, որոնք տուժել են կենցաղային բռնությունից:
Մրցաշարի կազմակերպիչների խոսքերով, բարձրակրունկ կոշիկներով վազքը կրում էր խորհրդանշական բնույթ, որը ցույց էր տալիս այն դժվարությունները, որոնց հետ առնչվում են կանայք և երեխաները անբարենպաստ ընտանիքներում:
Նման մրցաշարերը տեղի են ունենում աշխարհի շատ երկրներում և կրում են բարեգործական բնույթ: Մրցավազքի արդյունքների համաձայն` մասնակիցներին նվերներ են հանձնվում, իսկ տոմսերից և գրանցումներից ստացված գումարները տրամադրվում են հասարակական կազմակերպություններին:
